भ्रष्टाचार विरूद्धको प्रदर्शनमा गोली लागेर घाइते भएका लक्ष्मण नेपालीलाई थप उपचारका लागि काठमाडौं पठाइएको छ।
नेपाली सेनाको हेलिकप्टरमार्फत बिहीबार नेपालीलाई थप उपचार गर्न काठमाडौंको टिचिङ अस्पताल पठाएको कास्कीकी सिडिओ रुद्रादेवी शर्माले जानकारी दिइन्।
शर्माले केहीदिन अघि पोखरामा उपचाररत आन्दोलनका घाइतेहरूको अवस्था बुझ्न अस्पताल गएकी थिइन्।
अस्पतालका चिकित्सक र घाइतेका परिवारसँग सल्लाह गरेर सिडिओ शर्माले नेपालीलाई थप उपचार गर्न काठमाडौं पठाएको बताइन्।
नेपाली पोखरा स्वास्थ्य विज्ञान प्रतिष्ठानमा उपचाररत थिए। प्रतिष्ठानका निर्देशक डा. प्रेमराज पंगेनीले नेपालीलाई थप ‘क्रिटिकल केयर’ को आवश्यकता परेकाले टिचिङ अस्पताल रिफर गरिएको बताए।
पोखरा महानगरपालिका–१३ काहुँखोलाका नेपाली कक्षा ११ मा अध्ययनरत छन्। उनलाई भदौ २४ गते जिल्ला प्रहरी कार्यालय अगाडि गोली लागेको थियो। आन्दोलनमा घाइते भएपछि फिष्टेल अस्पतालको एम्बुलेन्सले उनलाई पोखरा स्वास्थ्य विज्ञान प्रतिष्ठानको अस्पतालको आकस्मिक कक्षमा लगेको थियो।
अस्पतालका अनुसार, घाँटीमा गोली लागेर घाइते भएका नेपालीको दुबै हात र खुट्टा नचल्ने अवस्थामा पुगेका छन्।
उनको स्वास्थ्य अवस्था सुधारोन्मुख भए पनि घाँटीमा लागेको गोलीका कारण थप उपचार गर्दा श्वासप्रश्वासमा समस्या आउन सक्ने देखिएकाले काठमाडौं पठाएको उनले बताए।
‘घाइतेको स्वास्थ्य अवस्था सुधारोन्मुख नै छ। घाउ घाँटीमा लागेकाले अरू कुनै समस्या हुन्छ कि, श्वास फेर्न गाह्रो हुन्छ कि भनेर राय अनुसार थप क्रिटिकल केयर गर्न काठमाडौं रिफर गरेका हौं।’
जेनजीले भदौ २३ गते भ्रष्टाचार विरूद्ध आन्दोलन गर्दा राज्यका तर्फबाट अत्यधिक दमन भएको भन्दै भोलिपल्ट भदौ २४ गते पनि आन्दोलन भएको थियो। आन्दोलनमा नेपाली पनि साथीहरूसँगै गएको उनका दिदी लक्ष्मीले बताइन्।
पोखरामा प्रदर्शनमा ३ जनाको मृत्यु भएको थियो भने २१ जना घाइते भएका थिए। प्रदर्शनकारीले पोखरामा रहेका सम्पूर्ण सरकारी कार्यालयहरु र केही निजी व्यवसायिक प्रतिष्ठान तोडफोड र आगजनी गरेका थिए।
-1746009348.jpg)
