ग्वार्कोस्थित किष्ट शिक्षण अस्पतालले क्यान्सरका बिरामीलाई लक्षित गरी प्यालियटिभ केयर युनिट (प्रशामक सेवा कक्ष) संचालनमा ल्याएको छ। क्यान्सरबाट गम्भीर अवस्थामा रहेका बिरामीलाई एक महिनासम्म नि:शुल्क बेड सेवा प्रदान गर्ने निर्णय गरेको हो।
क्यान्सरका बिरामीहरूको भावनात्मक तथा शारीरिक पीडा कम गरी सुख तथा सहजताका साथ अन्तिम सास फेर्न चाहने बिरामीका लागि असोज २७ देखि कात्तिक मसान्तसम्म एक महिनासम्म निःशुल्क बेड सेवा प्रदान गर्ने जनाएको हो।
योसँगै अस्पतालले प्यालियटिभ केयर युनिटको औपचारिक रूपमा शुभारम्भ गरेको छ।
सोमबार अस्पतालले एक कार्यक्रम गर्दै सानु खड्की लगायत बिरामी तथा बिरामीका आफन्तको हातबाट सो सेवाको सुरूआत गरेको हो।
क्यान्सर सम्बन्धी सर्जरी, किमोथेरापी, इम्युनोथेरापी, टार्गेटेड थेरापी र हर्मोनल थेरापी लगायत उपचार सेवा दिदै आएको अस्पतालले प्यालियटिभ केयर समेत सुरू गरी क्यान्सरको दुखाइ नियन्त्रण, भावनात्मक तथा आध्यात्मिक परामर्श जस्ता सेवा एकै ठाउँमा उपलब्ध गर्ने बताएको छ।
के हो प्यालियटिभ केयर?
क्यान्सरको उपचारको अन्तिम चरणमा बिरामी शारीरिक पीडा, मानसिक तनाव र सामाजिक एक्लोपनको सामना गरिरहेका हुन्छन्। यस्तो अवस्थामा चिकित्सा सम्बन्धी मात्र उपचार नभई भावनात्मक तथा शारीरिक रूपमा सहज मृत्युको लागि सान्त्वना तथा गरिने स्नेह पूर्ण केयर हो।
-1746009348.jpg)
