‘ट्रान्सपरेन्सी अफ ह्वाट, हाउ एन्ड हु?, खबरदार यो बलिदान खेर नजाओस्’ लेखिएको प्लाकार्ड राखेर सरिष्मा थापा ३३ दिनदेखि माइतीघरमा धर्ना बसिरहेकी छन्।
उमेरले उनी पनि जेनजी पुस्ताकै हुन्। २३ वर्षकी सरिष्मा चौबीसै घन्टा माइतीघरमै बस्छिन्।
पानी पर्दा नजिकैको पसल र होटलमा ओत लाग्छिन्। पानी नपरेका बेला त्यही सडकमा आएर बसिरहेकी छन्।
माइतीघरमा बसेको एक महिना बितिसक्दा पनि उनको माग बुझ्न सरकार त के कुनै जेनजी प्रतिनिधि समेत पुगेका छैनन्।
'आजसम्म कुनै पनि जेन-जी प्रतिनिधि वा सरकारको पक्षबाट कोही पनि आउनु भएको छैन,' सरिष्माले भनिन्, 'त्यहीँ बसेका अर्का व्यक्तिलाई जेनजी प्रतिनिधि र गृहमन्त्रीले भेटेर जानुभयो।'
उनले आफू कुनै पनि संघसंस्थासँग आवद्ध नभई एक्लै भ्रष्टाचार विरूद्ध बोल्नका लागि सडकमा आएकाले पनि सरकारले बेवास्ता गरेको हुनसक्ने बताइन्।
संघसंस्थाको साथमा उभिएको भए साथ दिन आउँथे। शारीरिक रूपमा कमजोर भए पनि अहिलेसम्म आफ्ना मागहरूबाट पछि नहटेको उनको भनाइ छ।
एक्लै बस्दा सरकारले बेवास्ता गरेपछि सरिष्माले पनि संस्थागत रूपमा आफ्नो आन्दोलन अघि बढाउने तयारी गरेकी छन्।
उनले भदौ २९ गतेदेखि माइतीघरमा धर्ना थालेकी थिइन्।
‘अन्तरिम सरकार बने पनि यो सिसाजस्तै पारदर्शी हुनुपर्यो। अनुहारमा जे देखिएको छ हामीलाई पनि सरकार त्यस्तै चाहियो भनेर धर्ना थालेकी हुँ,’ उनले भनिन्।
भ्रष्टाचारमुक्त समाज निर्माण गर्ने भनेर भदौ २३ गते जेन–जीहरूको देशव्यापी आन्दोलन भयो। त्यो दिन काठमाडौंमा १७ सहित गरेर १९ जनाको मृत्यु भयो। २४ गते भएको आन्दोलनमा ५७ जनाको ज्यान गयो।
७६ जनाको मृत्यु भएर नेताहरू परिवर्तन गर्नका लागि मात्र जेनजीले रगत नबगाएको उनले बताइन्। अब बन्ने सरकार भ्रष्टाचारमुक्त हुनुपर्ने उनको भनाइ छ। त्यही अनुसारले काम देखिनुपर्ने उनले बताइन्।
अहिले सरकारमा रहेका मन्त्रीहरूको सम्पत्ति जनताले थाहा पाउनुपर्ने उनले बताइन्।
साथै, प्रधानमन्त्री, मन्त्री र उच्च अधिकारीहरूको सम्पत्ति विवरण सार्वजनिक गर्नुपर्ने, प्रत्येक मन्त्रालयले ३–६ महिनाको छोटो योजना र खर्च प्राथमिकता सार्वजनिक गर्नुपर्ने,अन्तरिम सरकारले राजनीतिक नियुक्ति वा लामो अवधिको नीति निर्णय गर्न नहुनेलगायत माग राखेकी छन्।
‘हामीले चुनाव, प्रधानमन्त्री र मन्त्रीको मुहार फेर्नमात्र रगतको खोला बगाएका होइनौं,’ सरिष्माले भनिन्, ‘नेताको होइन देशको मुहार फेर्न आएका हौं।’
यो पनि:
के हो ८ दिनदेखि माइतीघरमा धर्ना बसिरहेकी जेन-जी युवतीको माग?
1635339834.jpeg)
-1746009348.jpg)
