पूर्वअतिरिक्त सचिव डा. संगीता मिश्राविरूद्ध अख्तियार दुरूपयोग अनुसन्धान आयोगले आइतबार भ्रष्टाचार मुद्दा दायर गरेको छ।
मिश्रासहित १४ जनाविरूद्ध अख्तियारले विशेष अदालतमा भ्रष्टाचार मुद्दा दर्ता गरेको अख्तियारका प्रवक्ता राजेन्द्रकुमार पौडेलले सेतोपाटीलाई जानकारी दिए।
मुद्दा दायर भएपछि डा. मिश्राले आफूले नबिराएको र नडराएको भन्दै देशको न्याय प्रणालीप्रति गहिरो विश्वास राख्ने बताएकी छन्।
आइतबारै उनले सामाजिक सन्जाल फेसबुकमा लामो स्ट्याटस लेख्दै यस्तो बताएकी हुन्।
उनले अब आफू कानुनी बाटोबाट लड्ने पनि बताएकी छन्।
मिश्राले लेखेकी छन्, 'म देशको न्याय प्रणालीप्रति गहिरो विश्वास राख्छु। त्यसैले अब म कानुनी बाटोबाट लड्नेछु। यस्तो असहज परिस्थितिमा मेरो हौसला बढाउने र न्यायका लागि लड्न उत्प्रेरित गर्ने देश र मधेसका सम्पूर्ण अग्रज, साथी र शुभचिन्तकप्रति आभार व्यक्त गर्दै म तपाईंहरूलाई विश्वास दिलाउन चाहन्छु कि सत्यको जित हुनेछ। र, त्यो न्यायालयद्वारा छिट्टै स्थापित हुनेछ।'
उनले आफू २०७० सालमा स्वास्थ्य मन्त्रालयको उच्च तहमा खुला प्रतिस्पर्धाबाट पुगेको भन्दै आफ्नो सो नियुक्तिविरूद्ध सर्वोच्च अदालतमा मुद्दा हालिएको तर आफूले सफाइ पाएको उल्लेख गरेकी छन्।
त्यसपछि १२ तहमा बढुवा हुँदा सर्वोच्च अदालतले सफाइ दिइसकेको मुद्दामा अधिकार क्षेत्र मिचेर पुनः अनुसन्धान गरिएको र आफूले फेरि सफाइ पाएको लेखेकी छन्।
स्वास्थ्य क्षेत्रमा व्याप्त नीतिगत भ्रष्टाचार, राजनीतिक हस्तक्षेप, स्वार्थ समूह र केही संस्थाको स्वेच्छाचारिताविरूद्ध आफूले निरन्तर रूपमा बोल्दै आएको भन्दै उनले त्यसकै परिणाम स्वरूप आफूलाई धम्की दिने, अख्तियारमा फसाउने र करिअर नै समाप्त पार्ने नियोजित प्रयास भएको आरोप लगाएकी छन्।
यसको जानकारी आफूले सम्बन्धित निकायहरूमा पटक–पटक गराउँदै आएको पनि मिश्राले बताएकी छन्।
उनले पहिले आफूलाई महानिर्देशक पदबाट हटाएर मन्त्रालयमा काम नदिई राखिएको पनि बताएकी छन्। स्वास्थ्य सचिवको पदोन्नतिको सन्दर्भमा पनि आफूले सार्वजनिक प्रतिवाद गरेको र कानुनी उपचारका लागि गएको उनले लेखेकी छन्। उनका अनुसार सो मुद्दा अहिले सर्वोच्च अदालतमा विचाराधीन छ।
डा. मिश्राले आफू लामो बिदामा बसेको उल्लेख गर्दै भदौ २३–२४ का घटनापछि काममा फर्किएको बताएकी छन्।
आफूलाई वर्तमान सरकारमा स्वास्थ्य मन्त्री बन्ने प्रस्ताव आएको तर आफ्नो नागरिकता, एउटा उजुरी र अख्तियारमा अनुसन्धानको नाममा आफ्नो शपथ ग्रहण रोकिएको उनले बताएकी छन्।
'स्वास्थ्य सेवा विभाग अन्तर्गत पर्ने एउटा महाशाखाले गर्ने नियमित खरिद प्रक्रियामाथि अनुसन्धानको क्रममा कार्यालय प्रमुखको आधारमा मेरो जिम्मेवारी रहने स्वाभाविक कुरा हो। तर मलाई मेरो नैतिक धरातल राम्ररी थाहा छ र यो विषयको छिट्टै न्यायिक निरूपण पनि हुने विश्वास छ,' उनले लेखेकी छन्।
अख्तियारले आइतबार मिश्रासहित स्वास्थ्य सेवा विभाग व्यवस्थापन महाशाखाका तत्कालीन निर्देशक डा. श्रवणकुमार थापा, वरिष्ठ स्वास्थ्य प्रशासक डा. सुरेन्द्रप्रसाद चौरसिया, स्वास्थ्य सेवा विभागका निर्देशक डा. विवेककुमार लाल, तत्कालीन प्रमुख लेखा नियन्त्रक भुवनप्रसाद काफ्ले, विभागका कानुन अधिकृत सिता घिमिरे, जनस्वास्थ्य अधिकृत दीपक अधिकारीविरूद्ध मुद्दा दर्ता गरेको हो।
त्यस्तै, तत्कालीन शाखा अधिकृत यादवप्रसाद सापकोटा, लेखा अधिकृत शम्भु प्रसाद ढकाल, लेखापाल तिलकराम ढकाल, विभागका बायोमेडिकल इन्जिनियर आशिष चौहान, पद्मा मिश्र, जनस्वास्थ्य निरीक्षक संजयकुमार साह, म्याक्सिम इनकर्पोरेसन ट्रेडर्स प्रालि तथा उक्त कम्पनीका मुख्य भई कार्य गर्ने सुन्दर भुसालविरूद्ध मुद्दा दायर गरिएको छ।
डा. मिश्रासहित १४ जनाले स्वास्थ्य सेवा विभागको म्यानोग्राफी मेसिन खरिद प्रक्रियामा १४ करोड ६ लाख ८५ हजार रूपैयाँ भ्रष्टाचार गरेको अख्तियारको आरोप छ। मिश्रासहित १४ जनालाई भ्रष्टाचार गरे वापतको रकम बिगो कायम गरिएको अख्तियारका प्रवक्ता पौडेलले जानकारी दिए।
मिश्रा स्वास्थ्य सचिवको आकांक्षी थिइन्। प्रदीप पौडेल मन्त्री हुँदा उनलाई स्वास्थ्य सचिव नबनाएर डा. विकास देवकोटालाई बनाएका थिए।
साथै सुशीला कार्की नेतृत्वमा अन्तरिम सरकार बनेपछि मिश्राले अतिरिक्त सचिव पदबाट राजीनामा दिएकी थिइन्। उनलाई स्वास्थ्य तथा जनसंख्यामन्त्री बनाउने तयारी थियो। तर अख्तियारले भ्रष्टाचार मुद्दा अघि बढाउन लागेपछि उनलाई स्वास्थ्य मन्त्री बनाइएको थिएन।
1635339834.jpeg)
-1746009348.jpg)
