पाल्पामा जुवा खेल्न पैसा सापटी नदिएको रिसमा कुटपिट गर्दा एक वृद्धाको ज्यान गएको छ।
जिल्ला प्रहरी कार्यालय पाल्पाका अनुसार माथागढी गाउँपालिका वडा नं. ४ देउगीरमा जुवा खेल्न पैसा सापटी नदिएको भन्दै ७६ वर्षीय फुलमाया जिसीको हत्या भएको हो।
जिल्ला प्रहरी कार्यालय पाल्पाका सूचना अधिकारी प्रहरी नायब उपरीक्षक होम प्रकाश चौधरीले सोमबार राति १२ बजेतिर माथा गढी गाउँपालिका वडा नं. ४ झडेवाका ३७ वर्षीय मीन बहादुर विश्वकर्माले कुटपिट गरी जिसीको हत्या गरेको जानकारी दिए।
कुटपिटबाट फुलमायाका श्रीमान ८२ वर्षीय प्रेम बहादुर जिसी घाइते भएका छन्।
प्रहरीका अनुसार विश्वकर्माले सोमबार राति देउगीरमा जुवा खेल्दा हारेपछि वृद्ध दम्पतीसँग पैसा सापटी मागेका थिए। जिसी दम्पतीले नभएको भन्दै पैसा नदिएपछि विश्वकर्माले नजिकै रहेको हँसियाले प्रहार गरेका थिए।
हँसिया प्रहारबाट टाउकोमा गम्भीर चोट लागेकी फुलमायाको घटनास्थलमै मृत्यु भएको प्रहरी नायब उपरीक्षक चौधरीले बताए।
घाइते प्रेम बहादुरलाई पाल्पामा उपचार हुन नसकेपछि मंगलबार बिहान बुटवल पठाइएको प्रहरीले जनाएको छ।
घटनामा संलग्न विश्वकर्मालाई प्रहरीले राति नै नियन्त्रणमा लिएको छ।
वृद्ध दम्पतीमाथि हँसिया प्रहार गरेपछि घटनास्थलबाट फरार भएका विश्वकर्मालाई आफ्नै घरमा बसेको अवस्थामा पक्राउ गरिएको प्रहरी नायब उपरीक्षक चौधरीले बताए।
प्रहरीले घटनाबारे थप अनुसन्धान सुरु गरेको छ।
-1746009348.jpg)
