धनुषा र महोत्तरी हुँदै भारतको सीमामा प्रवेश गर्ने बिगही नदीमा छठका लागि दुई देशको साझा घाट निर्माण गरिएको छ।
नेपाल–भारत सीमामा बिगही नदीको किनारमा करिब दुई किलोमिटर लम्बाइमा निर्मित मनोरम छठ घाटमा नेपालतर्फका मटिहानी नगरपालिकाका वडा नम्बर ६, ७ र ८, धनुषाको मुखियापट्टी मुसर्नियाँ गाउँपालिका–३ को तुलसियाही र भारततर्फबाट मधवापुर र रामपुरका व्रतालुका लागि छठ घाट निर्माण गरिएको हो।
दुई देश र दुई राष्ट्रियता भए पनि समान धर्म, संस्कृति, चाडपर्व, बिहेबारी र सुखदुःख आदानप्रदानको उन्नत प्रचलनले अहिले दुवैतर्फका नागरिकले साझा छठ घाट निर्माण गरिएको मटिहानी नगरपालिकाका नगरप्रमुख हरिप्रसाद मण्डलल बताए।
अहिले नेपाल–भारतको यो साझा घाट सजाउने कार्य अन्तिम चरणमा पुगेको छ। नेपालतर्फका मटिहानी र तुलसियाही एवं भारततर्फका मधवापुर र रामपुरका सर्वसाधारण सरसफाइ तथा सजावटमा जुटेका हुन्।
सूर्यदेव र षष्ठीदेवी (बोलीचालीमा छठीदेवी) को उपासना गरिने यो पर्वमा निराहार व्रतको कात्तिक शुक्ल षष्ठी तिथिका साँझ अस्ताउँदो र सप्तमी तिथिको बिहान उदाउँदो सूर्यलाई यसै घाटमा नुहाएर बर्तालुले अर्घ्य (अर्घ) दिनेछन्।
यस घाटमा दुवैतर्फ (नेपाल–भारत) का गरी दुई हजार बढी व्रतालुले अर्घ्य दिने बताइएको छ। यहाँको छठ घाट हेर्न १० हजार बढी श्रद्धालु उपस्थित हुने अनुमान गरिएको छ। —न्युज एजेन्सी नेपाल
-copy-1761394385.jpg)
-1746009348.jpg)
