सुर्खेतकी १६ वर्षीया इनिशा विकको बलात्कार र हत्या प्रकरणमा सरकारी वकिल कार्यालयले आइतबार चार जनाविरुद्ध अभियोग पत्र दर्ता गरेको छ।
प्रहरीले अनुसन्धान प्रतिवेदन बुझाएको चार दिनमा सरकारी वकिल कार्यालयले जिल्ला अदालत सुर्खेतमा अभियोगपत्र दर्ता गरेको हो।
अभियोगपत्र दर्तासँगै सोमबारदेखि नै अभियुक्तहरूको बयान हुने जिल्ला अदालत सुर्खेतका सूचना अधिकारी उज्वलदेव रावलले जानकारी दिए।
'अभियोगपत्र दर्ता भएको छ। सोमबारदेखि नै बयान सुरू हुन्छ,' उनले भने।
सरकारी वकिल कार्यालयले इनिशामाथि सामूहिक बलात्कार भएको र सोही अनुसार कारबाही माग दाबी गरेको छ।
प्रहरीले सामूहिक नभई एक जनाले मात्रै करणी गरेको मुख्य अभियुक्तलाई जबरजस्ती करणी र कर्तव्य ज्यानसम्बन्धी मुद्दा कसुरमा जन्म कैदको मागदाबी गर्दै अनुसन्धान प्रतिवेदन बुझाएको थियो। बाँकी तीन जनालाई ज्यान सम्बन्धी कसुरमा मुद्दा चलाउन माग प्रहरीले गरेको थियो।
मृतकको डिएनए रिपोर्ट, मोबाइल ट्याप सम्बन्धी फरेन्सिक रिपोर्ट र टक्सिकोलोजी सम्बन्धी रिपोर्ट आइ नपुग्दै प्रहरीले इनिशा सम्बन्धि आफ्नो अनुसन्धान प्रतिवेदन सरकारी वकिल कार्यालयमा बुझाएको थियो।
सरकारी वकिल कार्यलयले भने शवको प्रकृति, पोस्टमर्टम रिपोर्ट, सिआइबीको अनुसन्धानबाट खुलेका विषय, वारदातस्थल, पीडित र पीडक पक्षका बयानका आधारमा सामूहिक बलात्कारपछि हत्या भएको निष्कर्ष निकाल्दै सोही अनुसारको मुद्दा दर्ता गरेको हो।
सरकारी वकिल कार्यालयको अभियोगपत्रमा मुख्य अभियुक्तले इनिशालाई प्रेम जालमा पारी ललाई फकाइ वीरेन्द्रनगर-४ स्थित जनजागरण सामुदायिक वनमा लिएर गएको र आफ्ना थप तीन साथीहरूलाई फोन गरेर बोलाएको उल्लेख छ।
'.... सबै जना बालकहरू मिलि मृतक नाबालिकालाई सामूहिक रूपमा जबरजस्तीकरणी गरी सो करणीको कारणबाट मृतकको योनीबाट अत्यधिक रक्तश्राव भई सोही कारण मृत्यु भएको देखिई यी कानुनको विवादमा परेका बालकहरूले मृतकलाई सामूहिक रूपमा जबरजस्तीकरणी गरी कर्तव्य गरी मारेको देखिएको..,' अभियोगपत्रमा भनिएको छ।
पक्राउ परेका बालकहरूले सोधपुछका क्रममा साथीले फोन गरी सहयोगका लागि बोलाएको भन्ने बयान दिए पनि प्रमाणबाट पुष्टि नभएको सरकारी वकिल कार्यालयको भनाइ छ।
उनीहरू घटना हुँदा चारै जना सँगै रहेको देखिएको उल्लेख छ। साथै मृतकको ढाड र खुट्टामा खरोजहरू देखिएको अभियोगपत्रमा उल्लेख छ।
'उनीहरूले भने अनुसार उद्धारको कार्य गरेको नदेखिएको समेतको मिसिल संलग्न तथ्य प्रमाणहरूबाट चारै जनाले जबरजस्ती करणी गरी ज्यान मारेको वारदात पुष्टि भएको देखिई निज बालकहरूले सामूहिक जबर्जस्ती करणी तर्फको मुलुकी अपराध संहिता,२०७४ को दफमा २१९ को उपदफा (१) विपरीत उपदफा (२) र उपदफा (७) बमोजिमको कसुर अपराध गरेको तथा कर्तव्य ज्यानतर्फ मुलुकी अपराध संहिता २०७४ को दफा १७७ (१) बमोजिमको कसुर गरेको तथ्य पुष्टि हुन आयो,' अभियोगपत्रमा भनिएको छ।
सरकारी वकिल कार्यालयले आरोपीहरू १८ वर्षभन्दा कम उमेरका रहेको देखिएकाले बालबालिकासम्बन्धी ऐन २०७५ को दफा ३६(४) बमोजजिम हुने कारबाही साथै अपराध पीडित संरक्षण ऐन २०७५ को दफा ४१ बमोजिम क्षतिपूर्ति शुल्क मागदाबी गरेको छ।
उक्त दफामा १६ वर्ष वा सोभन्दा माथि र १८ वर्ष वा सोभन्दा कम उमेरका बालबालिकाले कुनै कसुरजन्य कार्य गरेको भए निजलाई कानुन बमोजिम उमेर पुगेको व्यक्तिलाई हुने सजायको दुई तिहाई सजाय हुनेछ भनिएको छ।
मुलुकी अपराध संहिता २०७४ को दफा १७७ मा ज्यान मार्ने नियतले कुनै काम गर्न नहुने उल्लेख छ। त्यस्तो कार्य गर्ने वा गराउने व्यक्तिलाई जन्मकैद हुने उल्लेख छ।
अपराध संहिताकै २१९ ले जबरजस्ती करण कसुरमा कारबाहीको व्यवस्था गरेको छ।
त्यसमा कुनै महिलालाई निजको मञ्जुरी नलिई करणी गरेमा वा मञ्जुरी लिएर भए पनि १८ वर्षभन्दा कम उमेरको कुनै बालिकालाई करणी गरेमा निजले त्यस्तो महिला वा बालिकालाई करणी गरेको मानिनेछ भनिएको छ।
पीडित १६ वर्षभन्दा बढी, १८ वर्षभन्दा कम उमेरकी महिला भए अभियुक्तलाई १० वर्षदेखि १२ वर्षसम्म सजाय हुने व्यवस्था छ। सामूहिक रूपमा जबरजस्ती करणी गरेमा थप पाँच वर्ष कैद सजाय हुने उल्लेख छ। जबरजस्ती करणी गरी ज्यान मारेको कसुरमा भने जिवित रहेसम्म कैद गर्नुपर्ने सजाय तोकिएको छ।
ट्युसन पढ्न बिहानै निस्केकी इनिशा फागुन २३ गते बिहान वीरेन्द्रनगर नगरपालिका–१ स्थित सामुदायिक वनको पार्कमा मृत अवस्थामा फेला परेकी थिइन् ।
इनिशाको शव अझै सुर्खेतको कालो गाउँस्थित कर्णाली प्रादेशिक अस्पतालमै छ। इनिशाका अभिभावकले चारै जनाका बिरुद्ध सामूहिक बलात्कार गरी हत्या गरेको भन्दै किटानी जाहेरी दिएका थिए।
-1773215333.jpg)
-1746009348.jpg)
