डोल्पा जिल्ला कारागारबाट सुरूङ खनेर भागेका आठ जना कैदीबन्दीमध्ये दुई जना पक्राउ परेका छन्। मंगलबार बिहान रूकुम पश्चिममा पक्राउ परेका उनीहरूलाई डोल्पा लगिएको छ।
पक्राउ पर्नेमा रूकुम पश्चिमको आठबिसकोट नगरपालिका–१० का ३२ वर्षीय रामबहादुर विक र सल्यानको कुमाख गाउँपालिका–५ का २८ वर्षीय रेशम राना छन्। दुवै जना जबरजस्ती करणी मुद्दामा कैद भुक्तान गरिरहेका थिए।
मंगलबार बिहान साढे १० बजेतिर रूकुम पश्चिमको आठबिसकोट नगरपालिका–६ दामाचौरस्थित खोली बगरमा उनीहरू पक्राउ परेका हुन्।
आठबिसकोट–९ राडीतर्फ जाँदै गरेको क.प्र. ०२–००१ च ०८३१ नम्बरको डबल क्याप बोलेरो जिप प्रहरीले जाँच गर्ने क्रममा उनीहरू भाग्न खोजेका थिए। सोही क्रममा प्रहरीले नियन्त्रणमा लिएको हो।
प्रहरीका अनुसार कारागारबाट भागेपछि उनीहरू जंगलको बाटो हुँदै पैदल हिँडेर रूकुम पुगेका थिए। त्यसपछि दुई जना गाडी चढेर अन्यत्र भाग्ने प्रयासमा थिए।
पक्राउ परेका दुवै जनासँग मोबाइल फोन भए पनि ती बन्द अवस्थामा थिए। उनीहरूले आफूहरू दुई जना मात्रै गाडी चढेको र बाँकी छ जना रूकुम पूर्वको सिस्ने हिमालतर्फ गएको प्रहरीलाई बताएका छन्।
डोल्पाका उच्च सरकारी अधिकारीका अनुसार फरार कैदीबन्दीहरूको मोबाइल लोकेसन रोल्पा क्षेत्रमा देखिएको थियो। उनीहरूले ठाउँ–ठाउँमा पुगेर मोबाइल खोल्ने र फेरि बन्द गर्ने गरेको पाइएको छ।
जिल्ला प्रहरी कार्यालय डोल्पाले पक्राउ परेका दुवै जनालाई बुधबार जिल्ला अदालतबाट म्याद थप गरी कानुनी प्रक्रिया अघि बढाउने तयारी गरेको छ।
जिल्ला कारागार डोल्पाबाट आठ जना कैदीबन्दी शनिबार राति सुरुङ खनेर फरार भएका थिए।
दुई जना पक्राउ परेसँगै अब थप छ जना फरार छन्। जबरजस्ती करणी मुद्दामा कैद भुक्तान गरिरहेका जाजरकोटको बारेकोट गाउँपालिका–१ का २५ वर्षीय यज्ञ विक, डोल्पाको त्रिपुरासुन्दरी नगरपालिका–७ का २९ वर्षीय कालिप्रसाद रोकाय र वडा नम्बर ४ का २८ वर्षीय हरिबहादुर बुढा पक्राउ पर्न बाँकी छन्।
त्यस्तै, चोरी मुद्दामा पुर्पक्षका लागि थुनामा रहेका रूकुम पश्चिमको आठबिसकोट नगरपालिका–५ का ३८ वर्षीय तिलक भण्डारी र वडा नम्बर ३ का ३२ वर्षीय आदेश भण्डारी पनि फरार छन्।
