काठमाडौं उपत्यका ट्राफिक प्रहरी कार्यालय प्रमुख एसएसपी नवराज अधिकारीले सडक अनुशासन उल्लंघन गर्ने र लापरबाहीपूर्ण तरिकाले सवारी चलाउने चालकहरूको सवारी चालक अनुमतिपत्र (लाइसेन्स) खारेज गर्ने प्रक्रिया सुरू गरिएको बताएका छन्।
यातायात व्यवसायी र मजदुर संगठनका प्रतिनिधिहरूसँगको अन्तर्क्रियामा बोल्दै एसएसपी अधिकारीले पटक–पटक नियम उल्लंघन गर्ने र जरिवाना तिर्न समेत नआउने चालकहरूलाई अब नछाडिने स्पष्ट पारे।
एसएसपी अधिकारीले ट्राफिक प्रहरीको पहिलो मिसन नै व्यवहारमा परिवर्तन ल्याउनु रहेको बताए।
उनले प्रहरी पनि समाजकै हिस्सा भएको स्वीकार गर्दै कमी-कमजोरी भए सुधार्दै लैजाने बाचा समेत गरे।
उनले राजस्व खातामा गएको रकम ट्राफिक प्रहरीले मिनाहा गर्न नसक्ने भन्दै यसमा स्पष्ट हुन आग्रह गरे।
सार्वजनिक यातायातमा १० प्रतिशत खराब आचरण भएका मजदुरका कारण ९० प्रतिशत राम्रा मजदुरहरू बद्नाम भइरहेको एसएसपी अधिकारीको भनाइ छ।
उनले भने, 'यदि कुनै ट्राफिक प्रहरीले अपारदर्शी ढंगले काम गर्छ वा नराम्रो व्यवहार गर्छ भने मलाई सिधै जानकारी दिनुस्, हामी तत्काल एक्सन लिन्छौँ। कसैलाई पनि पेशागत मर्यादा बाहिर गएर व्यवहार गर्ने छुट छैन। शरीरभरि मुन्द्रा लगाउने, कपाल ठाडो पार्ने र अभद्र पोसाक लगाउने चालक–सहचालकका कारण यात्रुहरू डराउने अवस्था छ। आफ्नो चालक र सहचालकको हुलिया र गेटअप चेन्ज गर्नुस्। हामी उनीहरूलाई तालिम दिन तयार छौं।'
यातायात क्षेत्रमा रहेको 'ठेक्का प्रणाली' (दिनको निश्चित रकम बुझाउनुपर्ने नियम) का कारण चालकहरूले तीव्र गतिमा गाडी कुदाउने र लुछाचुँडी गर्ने गरेको उनले औंल्याए।
यसको सट्टा इ–टिकटिङ र अनलाइन सिस्टममा जान व्यवसायीहरूलाई उनले आग्रह गरे।
बिहानै स्कुल बस र सार्वजनिक सवारीका चालकहरू मादक पदार्थ (मापसे) र लागु पदार्थ (लापसे) सेवन गरेर चलाइरहेको भेटिएको भन्दै ट्राफिक प्रहरी यसमा निकै कठोर हुने उनले बताए।
– न्युज एजेन्सी नेपाल
-1775034286.jpg)
-1746009348.jpg)
