युक्रेनमा रूसले भीषण हमला गर्दा कम्तिमा १७ जनाको मृत्यु भएको छ।
बुधबार बिहान युक्रेनी राजधानी किभ र आसपासका क्षेत्रमा रूसले दर्जनौं मिसाइल प्रहार गर्दा १७ जनाको मृत्यु र ४० जना घाइते भएको अन्तर्राष्ट्रिय समाचार संस्था रोयटर्सले लेखेको छ।
रूसले ११५ वटा ड्रोन, २४ वटा ब्यालिस्टिक मिसाइल र चार वटा जिरकोन क्रुज मिसाइल हानेको थियो।
युक्रेनको हवाई प्रतिरक्षा प्रणालीले ९० प्रतिशत ड्रोन खसाल्न सफल भए पनि एउटा पनि ब्यालिस्टिक मिसाइल र जिरकोन मिसाइल रोक्न नसकेको त्यहाँका वायुसेनालाई उद्धृत गरेर रोयटर्सले लेखेको छ।
आक्रमणमा प्रमुख खुद्रा व्यापारिक कम्पनीका गोदाम, कारखाना, रेल स्टेसन र अन्य लजिस्टिक केन्द्रहरू ध्वस्त भएका छन्।
युक्रेनको सबैभन्दा ठूलो निर्माण सामग्री बिक्री गर्ने कम्पनी एपिसेन्टरले आफ्ना दुई प्रमुख लजिस्टिक केन्द्र र एउटा कारखाना केही मिनेटमै ध्वस्त भएको जनाएको छ।
कम्पनीले क्षतिको पूर्ण विवरण आउन बाँकी रहेको भन्दै यो आक्रमण युक्रेनको उत्पादन, आपूर्ति प्रणाली, रोजगारी र आर्थिक पुनर्निर्माण क्षमतामाथिको योजनाबद्ध प्रहार भएको टिप्पणी गरेको छ।
युक्रेनको अग्रणी अनलाइन खुद्रा कम्पनी रोजेट्का की सह–संस्थापक इरिना चेचोट्किनाले पनि तीन वटा ब्यालिस्टिक क्षेप्यास्त्रले आफ्नो जीवनभरको मेहनत केही मिनेटमै खरानी बनाएको बताएकी छन्।
'त्यो रात मैले विनाश र पीडाबाहेक केही महसुस गरिनँ। तर जे भए पनि अघि बढ्नुपर्छ भन्ने भावना पनि जाग्यो। रोजेट्का अझै सञ्चालनमै छ,' उनले भनेकी छन्।
रुसको रक्षा मन्त्रालयले भने किभ र आसपासका सात वटा लजिस्टिक केन्द्रमा आक्रमण गरेको स्वीकार गर्दै ती स्थानमा दोहोरो प्रयोग (डुअल–युज) हुने सामग्री र ड्रोनका पुर्जा भण्डारण तथा वितरण हुने गरेको दाबी गरेको छ। रुस र युक्रेन दुवैले युद्धमा सर्वसाधारणलाई नियतवश निशाना बनाएको आरोप अस्वीकार गर्दै आएका छन्।
रोयटर्सका अनुसार पछिल्ला केही सातायता रुसले हरेक तीन–चार दिनको अन्तरालमा किभमाथि क्षेप्यास्त्र आक्रमण तीव्र बनाइरहेको छ।
बुधबार रातिको आक्रमणका क्रममा राजधानीभरि लगातार विस्फोट सुनिएका थिए भने आगलागीका कारण आकाश रातभरि उज्यालो बनेको थियो।
युक्रेनी राष्ट्रपति भोलोदिमिर जेलेन्स्कीले ब्यालिस्टिक क्षेप्यास्त्र रोक्ने मिसाइलको अभावकै कारण फेरि सर्वसाधारणको ज्यान गएको बताउँदै पश्चिमी सहयोगी राष्ट्रहरूलाई तत्काल थप प्याट्रियट प्रतिरक्षा मिसाइल उपलब्ध गराउन आग्रह गरेका छन्।
जेलेन्स्कीले अमेरिकासँग लगातार प्याट्रियट मिसाइल प्रणाली माग गर्दै आइरहेका छन्। दुई साता अघि ट्रम्पसँगको भेटमा पनि उनले त्यसबारेमा कुरा गरेका थिए।
यद्यपि महिनौंदेखि प्रतिरक्षा मिसाइलको अभाव झेलिरहेको युक्रेनमाथि रूसले आक्रमण तीव्र बनाउँदै लगेको छ। जबाफमा युक्रेनले पनि लामो दूरीमा प्रहार गर्ने मिसाइल हानेर रूसमा पनि ठूलो क्षति पुर्याइरहेको छ।
