चितवन राष्ट्रिय निकुञ्जको मध्यवर्ती क्षेत्रमा जंगली हात्ती ‘रोनाल्डो’ मृत फेला परेको छ।
शनिबार बिहान टिकौली मध्यवर्ती सामुदायिक वनको कार्यालय भवनबाट करिब ६ सय मिटर दक्षिणतर्फ विसहजार ताल जाने खगेरी नहरको बाटोमा हात्ती मृत अवस्थामा भेटिएको हो।
निकुञ्जका अनुसार अन्दाजी ४५ वर्षको उक्त हात्ती विद्युतीय करेन्ट लागेर मरेको प्रारम्भिक अनुमान गरिएको छ।
निकुञ्ज सुरक्षार्थ खटिएको वरण्डाभार सुरक्षा पोस्टका लागि विद्युतीकरण गर्न लगिएको करिब १६ फिट अग्लो पोलबाट तानिएको विद्युतीय तार मुखले टोकेको अवस्थामा हात्ती भेटिएको निकुञ्जले जनाएको छ।
निकुञ्जका अनुसार उक्त तार प्लास्टिकले लेपन गरिएको इन्सुलेटेड तार थियो।
प्रारम्भिक स्थलगत जाँचबुझका क्रममा हात्तीको मृत्यु विद्युतीय करेन्ट प्रवाहबाट भएको हुनसक्ने अनुमान गरिएको छ।
निकुञ्ज तथा राष्ट्रिय प्रकृति संरक्षण कोष–जैविक विविधता संरक्षण केन्द्र, सौराहाका पशु चिकित्सक तथा प्राविधिकको टोलीले आवश्यक प्रक्रिया पूरा गरी हात्तीको शव परीक्षण गरेको थियो।
शव परीक्षणपछि हात्तीका दुईवटा दारा सुरक्षित राखिएको निकुञ्जले जनाएको छ।
त्यसपछि रीतपूर्वक अन्त्येष्टि गरी हात्तीको शव सोही स्थानमा खाल्डो खनेर पुरिएको निकुञ्जले जनाएको छ।
निकुञ्जका अनुसार ‘रोनाल्डो’ लामो समयदेखि चितवन राष्ट्रिय निकुञ्ज, खोरसोर वन क्षेत्रलगायत मध्यवर्ती वन क्षेत्रमा विचरण गर्दै आएको थियो।
-1789814708.png)
-1746009348.jpg)
