७४ औं अन्तर्राष्ट्रिय भन्सार दिवसको अवसरमा आयोजित ४ किलोमिटर दौड प्रतियोगिता सम्पन्न भएको छ।
भन्सार विभाग त्रिपुरेश्वरदेखि थापाथली, माइतीघर, बानेश्वर, तीनकुने, हुँदै त्रिवि भन्सार कार्यालयसम्म दौड प्रतियोगिता भएको थियो।
प्रतियोगितामा पुरूषतर्फ सशस्त्र प्रहरीका रूपेश कार्कीले १५.३१ मिनेटमा दुरी पार गर्दै प्रथम स्थान हासिल गरे भने नेपाली सेनाका राजीव कुमार नेपालले १८.२० मिनेटमा दुरी पार गर्दै दोस्रो तथा नेपाल आर्मीकै संजीव माझीले १८.२२ मिनेटमा दुरी पार गर्दै तेस्रो स्थान हासिल गरे।
महिलातर्फ नेपाली सेनाकी लक्ष्मी खड्काले २२.२९ मिनेटमा दुरी पार गर्दै प्रथम तथा सशस्त्र प्रहरीकी तारा कुमारी गिरीले २३.२५ मिनेटमा दुरी पार गर्दै दोस्रो स्थान हासिल गरिन्।
त्यस्तै, सशस्त्रकै रिता खड्काले २५.०२ मिनेटमा दुरी पार गर्दै तेस्रो स्थान हासिल गरेकी छन्।
विजयी प्रतियोगीहरूलाई माघ १२ गते अन्तर्राष्ट्रिय भन्सार दिवसको अवसरमा त्रिवि भन्सार कार्यालयमा हुने विशेष समारोहमा नगद पुरस्कार तथा प्रमाण पत्र वितरण गरिने नेपाल भन्सार एजेन्ट संघ काठमाडौंका अध्यक्ष होमनाथ धमलाले जानकारी दिए।
पहिलो हुनेले रू २५ हजार, दोस्रो हुनेले १५ हजार र तेस्रो हुनेलाई रु १० हजार प्रदान गरिने छ।
नेपाली सेना, सशस्त्र प्रहरी बल, भन्सार कर्मचारी, भन्सार एजेन्ट, नेपाल फ्रेट फरवार्डरस एसोसियसन, नेपाल भन्सार एजेन्ट संघ काठमाडौं, नेपाल निर्यात परिषद ठमेल तथा नेपाल कुरियर सेवा संघ काठमाडौं सहित १५० जना प्रतियोगीहरूको सहभागिता थियो।
-1746009348.jpg)
