आइपिएलमा शीर्ष स्थानको दिल्ली क्यापिटल्समाथि किंग्स-११ पञ्जावले ५ विकेटको जित हात पारेको छ।
मंगलबार दुबईमा भएको खेलमा दिल्लीले दिएको १६५ रनको लक्ष्य पञ्जावले १९ ओभरमा ५ विकेटको क्षतिमा पार गर्यो।
पञ्जावको जितमा निकोलास पूरनले ५३ रनको योगदान दिए। उनले २८ बलमा ६ चौका र ३ छक्का हिर्काए। ग्लेन म्याक्सवेलले ३२ रन जोडे। दीपक हुडा १५ रन तथा जेम्स निशम १० रनमा नटआउट रहे।
त्यसअघि बिस्फोटक ब्याटिङ गरेका क्रिस गेलले १३ बलमा ३ चौका र २ छक्काको मद्दतमा २९ रनमा जोडे। ओपनर तथा कप्तान केएल राहुलले १५ रन बटुले।
बलिङमा दिल्लीका कागिसो रबडाले २ विकेट लिए।
त्यसअघि टस जितेर पहिले ब्याटिङ गरेको दिल्लीले ५ विकेटको क्षतिमा १६४ रन जोड्यो। दिल्लीका लागि ओपनिङ ब्याट्सम्यान शिखर धवनले नटआउट १०६ रन जोडे। उनले ६१ बलमा १२ चौका र ३ छक्का हिर्काए।
जससँगै धवन आइपिएलमा लगातार दुई शतक हिर्काउने पहिलो ब्याट्सम्यान बने। यद्यपी उनको टिम दिल्ली पराजित हुँदा शतक छायाँमा पर्यो।
धवन बाहेक दिल्लीका अन्य पाँच ब्याट्सम्यानले कुल ५४ रन रन मात्र जोड्न सके।
बलिङमा पञ्जावका मोहमद सामीले २ विकेट लिए।
जितसँगै पाँचौ स्थानको पञ्जावले १० खेलबाट ८ अंक जोडेको छ। शीर्ष स्थानको दिल्लीको समान खेलबाट १४ अंक रहेको छ।
आइपिएलमा बुधबार कोलकता नाइटराइडर्स र रोयल च्यालेन्जर्स बेंग्लोरबीच खेल हुनेछ