प्रधानमन्त्री कप एकदिवसीय राष्ट्रिय क्रिकेट प्रतियोगितामा त्रिभुवन आर्मी क्लबको लगातार पाँच खेलको अपराजित यात्रामा पूर्णविराम लागेको छ।
बुधबार दाङको लमहीमा भएको खेलमा आर्मीलाई मधेशले ३ विकेटले पराजित गरेको यो।
अंक तालिकामा १० अंक जोडेर दोस्रो स्थानमा रहेको आर्मीले यसअघि लगातार पाँच खेलमा जित निकालेको थियो। आर्मीलाई छैटौं खेलमा पराजित गरेको मधेसले भने पाँच खेलमध्ये दुई खेलमा जित निकालेको छ।
बुधबार आर्मीले दिएको २१८ रनको लक्ष्य मधेसले ७ विकेटको क्षतिमा ४८ ओभरमा पूरा गर्यो।
मधेसको जितमा रूपेश सिंहले अलराउन्ड प्रदर्शन गरे। प्लेयर अफ दि म्याच रूपेशले नटआउट ३८ रन बनाउँदा बलिङतर्फ २ विकेट लिएका थिए। रूपेशले २० बलमा २ चौका र २ छक्का प्रहार गर्दा मधेसको जित सम्भव भयो।
त्यसअघि मधेसका कप्तान अनिल साहले ४५ रन बनाउँदा हरिशंकर साह र पवन सर्राफले ३७-३७ रन जोडे। निशिल सिंहले जोडेको नटआउट १४ रन पनि महत्वपूर्ण सावित बन्यो।
बलिङमा आर्मीका नरेन साउदले ३ विकेट लिए भने सोमपाल कामी र बसिर अहमदले २-२ विकेट हात पारे।
टस जितेर पहिले ब्याटिङ गरेको आर्मीले ७ विकेटको क्षतिमा २१७ रन बनायो।
आर्मीका लागि भीम सार्कीले ८९ रन बनाए। उनले १२६ बलमा ४ चौका प्रहार गरे। सन्तोष कार्कीले ३३ रन र कुशल मल्लले २० बलमा नटआउट २४ रन जोडे।
बलिङमा मधेसका रूपेशसहित कमल गुप्ता र पवन सर्राफले २-२ विकेट लिए।
-1746009348.jpg)
