ललित स्मृती यु-१८ फुटबल प्रतियोगिताको उपाधिका लागि नेपाल पुलिस क्लब र ब्रिगेड ब्वाइज क्लबबीच प्रतिस्पर्धा हुने भएको छ।
ब्रिगेडले बिहीबार भएको सेमिफाइनलमा मनाङ मर्स्याङ्दी क्लबलाई ७-१ को फराकिलो अन्तरले पराजित गर्यो। ब्रिगेडका लागि रेजिन सुब्बाले ३०, ७१ र ८० मिनेटमा गोल गरेर ह्याट्रिक गरे। शिशिर लेखीले १५ र ५४ मिनेटमा गोल गरे।
जय गुरुङले ६४ र ब्रिजेस चौधरीले ८३ मिनेटमा गोल थपेका थिए। मनाङका लागि सचिन गुरुङले २५ मिनेटमा गरेको गोल सान्त्वनामा सीमित बन्यो।
पुलिसले भने जवालाखेल युथ क्लबमाथि ३-१ को जित हात पार्यो। पुलिसका लागि सन्जु सेनले २८ र पहिलो हाफको इन्जुरी टाइमको दोस्रो मिनेटमा गोल गरेका थिए। रविन राईले ८९ मिनेटमा अर्को गोल गरेपछि पुलिस फाइनलमा पुग्यो।
जवालाखेलका लागि शिशिरभक्त श्रेष्ठले ४४ मिनेटमा गोल गरेका थिए।
उपाधि भिडन्त आगामी आइतबार एन्फा कम्प्लेक्स सातदोबाटोमा दिउँसो ३ बजे हुनेछ।