स्पेनिस ला लिगाको उपाधि होडमा रहेको सेभिया पराजित भएको छ।
सेभियालाई सोमबार राति भएको खेलमा सेभियालाई एथ्लेटिक बिल्बाओले १-० गोलले पराजित गर्यो। खेलको ९० मिनेटमा गोल गर्दै सेभियामाथि बिल्बाओले रोमाञ्चक जित हात पार्यो।
हारसँगै ला लिगाको उपाधि होडमा रहेको सेभियालाई धक्का पुगेको छ। अंक तालिकाको चौथो स्थानमा रहेको सेभियाले शीर्ष स्थानको एट्लेटिको म्याड्रिडसँगको दूरी ३ अंकमा झार्ने मौका पनि गुमाएको छ।
ला लिगाको चार चरणको खेल बाँकी रहदा शीर्ष स्थानको एट्लेटिको म्याड्रिडको ७६ अंक छ।
दोस्रो स्थानको रियल म्याड्रिड र तेस्रो स्थानको बार्सिलोनाको समान ७४-७४ अंक रहेको छ। सेभिया ७० अंक जोडेर चौथो स्थानमा छ।
लिगमा यो साता हुने दुई खेलले उपाधि होडमा थप रोमाञ्चकता आउने अपेक्षा गरिएको छ।
शनिबार शीर्ष स्थानको एट्लेटिको म्याड्रिड र तेस्रो स्थानको बार्सिलोनाबीच खेल हुँदैछ। यस्तै सोमबार दोस्रो स्थानको रियल र चौथो स्थानको सेभियाबीच खेल हुनेछ।