क्रिस्टियानो रोनाल्डोले अन्तर्राष्ट्रिय फुटबलबाट संन्यास घोषणा गरेपछिको पहिलो खेलमै पोर्चुगलले लज्जास्पद हार बेहोरेको छ। शनिबार राति भएको खेलमा पोर्चुगल डेनमार्कसँग ४–१ गोलले पराजित भएको हो।
पोर्चुगलको ब्रागास्थित एस्टाडियो म्युनिसिपलमा भएको खेलमा डेनमार्कले पहिलो हाफमा एक र दोस्रो हाफमा तीन गोल गरेको थियो। पोर्चुगलले भने खेलको अन्तिम समयमा एक गोल फर्कायो।
खेलको ४३औँ मिनेटमा पिएर एमिल होयबर्गले पेनाल्टीमा गोल गर्दै डेनमार्कलाई अग्रता दिलाएका थिए। पोर्चुगलका रुबेन डियासले ह्यान्डबल गरेपछि डेनमार्कले पेनाल्टी पाएको थियो।
दोस्रो हाफमा रासमुस होइलुन्डले पोर्चुगलको रक्षापंक्तिलाई थप समस्यामा पारे। उनले ४९औँ मिनेटमा मिकेल डाम्सगार्डको पासमा गोल गर्दै डेनमार्कको अग्रता दोब्बर बनाए। त्यसको आठ मिनेटपछि अर्थात् ५७औँ मिनेटमा होयबर्गको पासमा व्यक्तिगत दोस्रो गोल गरेपछि डेनमार्क ३–० ले अघि बढ्यो।
७५औँ मिनेटमा योआखिम एन्डरसनले गोल गर्दै डेनमार्कको अग्रता ४–० बनाए। म्याथियास जेन्सनको पासमा उनले हेडरमार्फत गोल गरेका थिए।
खेलको इन्जुरी समयको तेस्रो मिनेटमा बर्नार्डो सिल्भाले पोर्चुगलका लागि सान्त्वना गोल फर्काए। जोआओ नेभेसको प्रहार रोकिएपछि प्राप्त बललाई सिल्भाले जाली चुमाएका थिए।
रोनाल्डोको सम्मानमा विशेष बिदाइ
खेलको नतिजाभन्दा पनि यस दिन पोर्चुगलका लागि रोनाल्डोको बिदाइ विशेष चर्चाको विषय बनेको थियो।
४१ वर्षीय रोनाल्डोले गत साता सामाजिक सञ्जालमा भिडियो सार्वजनिक गर्दै अन्तर्राष्ट्रिय फुटबलबाट संन्यास लिने घोषणा गरेका थिए। उनले पोर्चुगलका लागि २३४ खेल खेल्दै कीर्तिमानी १४६ गोल गरेका छन्। राष्ट्रिय टोलीबाट खेलेका खेल र गरेको गोल दुवै विश्व कीर्तिमान हुन्।
सन् २००३ मा पोर्चुगलको राष्ट्रिय टोलीबाट डेब्यु गरेका रोनाल्डोले आफ्नो अन्तर्राष्ट्रिय करिअरमा पाँच पटक बालोन डी'ओरसमेत जितेका छन्।
रोनाल्डोको सम्मानमा पोर्चुगलका सबै खेलाडी र मस्कट मैदान प्रवेश गर्दा उनको नाम र सात नम्बर अंकित जर्सी लगाएर आएका थिए। रंगशालामा उपस्थित समर्थकले पनि विशेष टिफो प्रदर्शन गर्दै 'रोनाल्डो गोट' लेखेका थिए। त्यस्तै, 'धन्यवाद कप्तान' भन्ने सन्देशसहितको ब्यानर पनि प्रदर्शन गरिएको थियो।
खेलको सातौँ मिनेटमा रंगशालाको स्कोरबोर्डमा पनि रोनाल्डोलाई धन्यवाद दिँदै सन्देश देखाइएको थियो।
रोनाल्डोले लगाउँदै आएको सात नम्बरको जर्सी क्लब ब्रुगका फरवार्ड कार्लोस फोर्ब्सलाई दिइएको थियो। पोर्चुगल फुटबल टोलीले सामाजिक सञ्जालमा नयाँ सात नम्बरको जर्सी सार्वजनिक गर्दै लेखेको थियो, 'नयाँ सात नम्बरको डेब्यु गर्ने समय आयो। किनकि एउटा सात नम्बर सधैँका लागि अमर रहनेछ।'
रोनाल्डोको सम्मानमा विशेष कार्यक्रम आयोजना गरिएको खेलमा पोर्चुगलले भने समर्थकलाई जितको खुसी दिन सकेन।
पोर्चुगलले नेसन्स लिगका सुरुवाती चारवटै खेल जितेर क्वार्टरफाइनलमा स्थान पक्का गरेको थियो। समूह विजेता बन्न पोर्चुगलले नोभेम्बर १७ मा कार्डिफमा हुने खेलमा वेल्ससँग हार टार्नुपर्नेछ। यता, दोस्रो स्थानमा रहेको डेनमार्कले मंगलबार नर्वेसँग खेल्नेछ। डेनमार्क पोर्चुगलभन्दा तीन अंकले पछाडि छ।
