अखिल नेपाल फुटबल संघ (एन्फा) को २०८२ वैशाख २६ गते धुलिखेलमा सम्पन्न नियमित साधारण सभा (कांग्रेस) को म्याण्डेट पालना गर्ने निर्णय गरिएको छ।
अध्यक्ष पंकजबिक्रम नेम्बाङ र महासचिव किरण राईलाई भ्रष्टाचार अभियोगमा मुद्दा दायार भएपछि वरिष्ठ उपाध्यक्ष वीरबहादुर खड्काले एन्फा बैठक बोलाएर यो निर्णय गराएका हुन्। वरिष्ठ उपाध्यक्षले बैठक बोलाएको विषयमा अध्यक्ष र महासचिवले अहिलेसम्म सार्वजनिक रुपमा प्रतिक्रिया भने दिएका छैनन्।
बैठकले २०८२ पौष १६ गतेको कार्यसमितिले गरेको निर्वाचनसम्बन्धी निर्णय बदर गरिएको छ।
विधानको व्यवस्था अनुसार २०८३-२०८७ को नियमित निर्वाचन प्रक्रिया अगाडि बढाउने निर्णय भएको छ। नयाँ नेतृत्व चयन, आवश्यक स्वीकृति, निलम्बन फुकुवा र संस्थाको स्वाधीन निर्णय कार्यान्वयनका लागि सबै सरोकारवालासँग सहयोगको अपिल गरिएको छ।
अध्यक्ष र महासचिवलाई सत्यतथ्य पेश गर्न ३ दिनको समय
२०८३ कात्तिक १३ गतेको बैठक निर्णय अनुसार लिखित रूपमा माग गरिएको जानकारी एन्फा अध्यक्ष र महासचिवले कार्यसमितिलाई नबुझाएकाले पुनः ३ (तीन) दिन भित्र सत्यतथ्य विवरण पेश गर्न अनुरोध गर्ने निर्णय भएको छ।
साथै, सोही बैठकबाट नियुक्त निमित्त महासचिव दामोदर भट्टराईलाई कार्यालय सञ्चालन, पत्राचार तथा प्रशासनिक गतिविधि सञ्चालनको पूर्ण अधिकार प्रदान गरिएको छ।
यु-१५ टोलीलाई नगद पुरस्कार र नयाँ प्रतियोगिताको घोषणा
फिफा यु-१५ वर्ल्ड फेस्टिभलमा उत्कृष्ट प्रदर्शन गर्ने यु-१५ खेलाडी तथा प्रशिक्षकहरूलाई जनही ५०-५० हजार रुपैयाँ र अफिसियलहरूलाई जनही ३०-३० हजार रुपैयाँ नगद पुरस्कार प्रदान गरिनेछ।
खेलाडीको प्रोत्साहनका लागि आगामी २०८३ साल माघ महिनामा 'एन्फा यु-१५ फुटबल' आयोजना गरिने भएको छ। उपाध्यक्ष विराटजंग शाहीको संयोजकत्वमा सम्पूर्ण कार्यसमिति सदस्य रहने गरी प्रतियोगिता सञ्चालन गरिने र फिफा, एफसी, मन्त्रालय, राखेप तथा व्यावसायिक प्रतिष्ठानहरूसँग बजेट र सहकार्यका लागि तयारी थालिनेछ।
प्रशिक्षण सुचारु र एकेडेमी सञ्चालन
हाल स्थगित अवस्थामा रहेको एन्फाको शनिबारको प्रशिक्षण कार्यक्रम तत्काल सुचारु गर्न प्राविधिक निर्देशक, प्रशिक्षक संघ र कर्मचारीहरूसहितको समिति गठन गरी काम सुरु गर्न निर्देश दिइएको छ। एन्फाद्वारा सञ्चालित एकेडेमीहरूको अवस्था र बजेटबारे प्रतिवेदन पेश गर्न सचिवालयलाई भनिएको छ।
दशौँ राष्ट्रिय खेलमा फुटबलतर्फको प्राविधिक समन्वय गरी महोत्सव सफल बनाउन सहयोग गर्ने निर्णय भएको छ।
सामग्री फिर्ताको पहल: एन्फाको नियमित कार्य सञ्चालनका लागि आवश्यक सामग्री फिर्ता ल्याउन सम्बन्धित निकायहरूमा पत्राचार गरिने भएको छ।
