नेपाल प्रिमियर लिग (एनपिएल) मा विराटनगर किंग्सले रोमाञ्चक खेलमा जनकपुर बोल्ट्सलाई २ रनले पराजित गरेको छ। आन्द्रे रसेलको अलराउन्ड प्रदर्शनपछि विराटनगरले अन्तिम बलसम्म पुगेको खेलमा सनसनीपूर्ण जित निकालेको हो।
मंगलबार कीर्तिपुरस्थित त्रिवि क्रिकेट मैदानमा १७५ रनको लक्ष्य पछ्याएको जनकपुरले निर्धारित २० ओभरमा ७ विकेट गुमाएर १७२ रन मात्र बनाउन सक्यो।
जनकपुरलाई अन्तिम ओभरमा जितका लागि १३ रन आवश्यक थियो। बलिङमा आएका रसेलले पहिलो बलमा सैफ हसनलाई एक रन दिए। दोस्रो बलमा उनले जनकपुरका कप्तान हरमित सिंहलाई क्याच आउट गराए।
तेस्रो बलमा अभिषेक तिवारीले चौका प्रहार गरे। चौथो बलमा एक रन लिएपछि जनकपुरलाई अन्तिम दुई बलमा जितका लागि ७ रन चाहियो। पाँचौँ बलमा हसनले चौका प्रहार गरेपछि खेल थप रोमाञ्चक बन्यो।
अन्तिम बलमा जनकपुरलाई जितका लागि ३ रन आवश्यक थियो। तर रसेलले हसनलाई बासिर अहमदबाट क्याच गराए। त्यससँगै विराटनगरले २ रनको रोमाञ्चक जित सुनिश्चित गर्यो।
अन्तिम बलमा विकेट लिएपछि रसेलसहित विराटनगरका खेलाडीले मैदानमै खुसी मनाए। अर्कोतर्फ जनकपुरका हसन भने नतिजा विश्वास गर्न नसकेर पिचमै घोप्टिएर केही समय स्तब्ध बने।
जनकपुरका लागि हसनले ४८ बलमा २ चौका र ५ छक्कासहित सर्वाधिक ७१ रन बनाए। विशाल शुस्लिङले ३० बलमा ४३ रन तथा जेम्स निसमले १५ बलमा २७ रन जोडे। अभिषेक तिवारी २ बलमा ५ रन बनाएर अविजित रहे।
जनकपुरको सुरुवात भने कमजोर रह्यो। दोस्रो ओभरमा त्रितराज दास ६ रनमा आउट भए। चौथो ओभरमा मोइन अली १० रन बनाएर रसेलको बलमा आउट भए। लगत्तै अनिल साह खाता नखोली रसेलकै बलमा क्याच आउट भएपछि जनकपुर ३० रनमा ३ विकेट गुमाएको अवस्थामा पुग्यो।
त्यसपछि हसन र विशाल शुस्लिङले चौथो विकेटका लागि ७६ रनको महत्वपूर्ण साझेदारी गरे। यो साझेदारीले जनकपुरलाई खेलमा फर्काएको थियो। १४औँ ओभरमा शुस्लिङ ४३ रन बनाएर आउट भए। उनलाई एन्जेलो म्याथ्युजले आउट गराए।
त्यसपछि निसमले आक्रामक ब्याटिङ गर्दै खेललाई जनकपुरको पक्षमा फर्काउने प्रयास गरे। उनले हसनसँग पाँचौँ विकेटका लागि ५६ रन जोडे। १९औँ ओभरमा निसम २७ रन बनाएर आउट भएपछि खेल फेरि विराटनगरको पक्षमा मोडियो। त्यसपछि हरमित पनि रसेलको बलमा आउट भए। अन्तिम बलमा हसनको विकेट लिएसँगै रसेलले विराटनगरलाई जित दिलाए।
रसेलले ४ ओभरमा ४५ रन खर्चेर ४ विकेट लिए। उनले ब्याटिङमा पनि अविजित ५२ रन बनाएका थिए। यही प्रदर्शनका कारण उनी प्लेयर अफ द म्याच घोषित भए। एन्जेलो म्याथ्युजले २ विकेट लिए भने रुपेश सिंहले एक विकेट हात पारे।
तीन अर्धशतकमा विराटनगरको १७४ रन
यसअघि टस हारेर पहिले ब्याटिङ गरेको विराटनगरले निर्धारित २० ओभरमा ३ विकेट गुमाएर १७४ रन बनाएको थियो।
विराटनगरका लोकेश बम, इमरान शेख र आन्द्रे रसेलले अर्धशतक बनाए। लोकेशले ४० बलमा ५०, इमरानले ४५ बलमा ५६ तथा रसेलले २९ बलमा अविजित ५२ रन जोडे।
विराटनगरको सुरुवात राम्रो हुन सकेन। पहिलो ओभरमै शेन जयसूर्या १ रन बनाएर मोइन अलीको बलमा स्टम्पिङ भए। त्यसपछि लोकेश र इमरानले दोस्रो विकेटका लागि १०७ रनको शतकीय साझेदारी गरे।
१३औँ ओभरमा इमरान ५६ रन बनाएर अभिषेक तिवारीको बलमा आउट भए। त्यसपछि पनि लोकेश र रसेलले रन गति कायम राखे। लोकेश ५० रन बनाएर १८औँ ओभरमा आउट भए।
अन्तिम ओभरहरूमा रसेलले आक्रामक ब्याटिङ गरे। उनले ५ छक्का र २ चौका प्रहार गर्दै विराटनगरलाई प्रतिस्पर्धात्मक योगफलमा पुर्याए। रसेल र शुबम रञ्जनेले चौथो विकेटका लागि अविजित साझेदारी गरे।
जनकपुरका लागि अभिषेक तिवारीले २ तथा मोइन अलीले १ विकेट लिए।
यस जितसँगै विराटनगरले चार खेलमा दोस्रो जित निकालेको छ। जनकपुरले पनि चार खेलमा दुई जित हात पारेको छ। दुवै टोलीको समान चार अंक भएको छ।
