चीनकी १३ वर्षीया पौडी स्टार यु जिदीले ४०० मिटर इन्डिभिजुअल मेडलेमा कीर्तिमानी जित हासिल गर्दै जापानको इची-नागोयामा भइरहेको २०औं एसियन गेम्समा स्वर्ण पदकको ह्याट्रिक पूरा गरेकी छिन्।
सुरुदेखि अन्त्यसम्मै अग्रता बनाएकी युले ४ मिनेट २८.५६ सेकेन्डको समय निकाल्दै सन् २०१४ देखि कायम रहेको गेम्स रेकर्डलाई करिब ४.५ सेकेन्डले तोडेकी हुन्।
युले निकालेको यो समय यस वर्ष विश्वकै चौथो तीव्र समय हो, जहाँ क्यानाडाकी विश्व कीर्तिमानधारी समर म्याकिन्तोस मात्र उनीभन्दा अगाडि छिन्। यस प्रतिस्पर्धामा चीनकै के वेन्सीले रजत (३.९५ सेकेन्ड पछाडि) र जापानकी मियो नारिताले कांस्य पदक जितेका छन्।
यसअघि नागोयामा २०० मिटर बटरफ्लाई र २०० मिटर इन्डिभिजुअल मेडले दुवैमा नयाँ गेम्स रेकर्डसहित स्वर्ण जितेकी युलाई सन् २०२८ को लस एन्जलस ओलम्पिकमा पदकको बलियो दाबेदारका रूपमा हेरिएको छ।
भारोत्तोलनमा री सोङ गमका तीन विश्व कीर्तिमान
अर्कोतर्फ उत्तर कोरियाकी २८ वर्षीया भारोत्तोलक री सोङ गमले महिला ४९ केजी समूहमा तीन वटा विश्व कीर्तिमान तोड्दै आफ्नो तेस्रो एसियाली खेलकुद स्वर्ण पदक सुरक्षित गरेकी छिन्। साविक विजेता रीले स्न्याचमा ९४ केजी र क्लिन एन्ड जर्कमा १२१ केजी भार उठाइन्, जुन दुवै अघिल्लो विश्व कीर्तिमानभन्दा १-१ केजी बढी हो।
यससँगै उनले कुल २१५ केजी भार उठाउँदै अघिल्लो विश्व कीर्तिमानलाई ४ केजीले सुधार गरिन्।
आफ्नो ऐतिहासिक सफलतापछि बोल्दै रीले भनिन्, ‘विश्व कीर्तिमान र यो स्वर्ण पदक मेरो लागि ठूलो अर्थ राख्छ, किनकि मैले यस प्रतियोगितामा आफ्नो सम्पूर्ण मिहिनेत पोखेकी थिएँ।’ उनले आफू त्यो विश्वास र अपेक्षाहरू बोकेर प्रतिस्पर्धाको मञ्चमा ओर्लिएको बताइन्।
-1790072299.jpg)
-1746009348.jpg)
