प्रतिनिधिसभा सदस्यसहित धनुषामा ४८ जना कोरोनाभाइरसका नयाँ संक्रमित थपिएका छन्।
जनता समाजवादी पार्टीका प्रतिनिधिसभा सदस्य डाक्टर सूर्यनारायण यादव कोरोना संक्रमित भएका हुन्।
प्रादेशिक जनस्वास्थ्य प्रयोगशाला जनकपुरमा गरिएको परीक्षणमा बालरोग विशेषज्ञ समेत रहेका प्रतिनिधिसभा सदस्य डाक्टर यादवमा कोरोना संक्रमण पुष्टि भएको हो।
त्यसैगरी जनकपुरधामस्थित जानकी हेल्थ केयरमा कार्यरत एक चिकित्सिकसहित ४ जनामा संक्रमण पुष्टि भएको प्रादेशिक जनस्वास्थ्य प्रयोगशालाले जनाएको छ।
त्यस्तै जनकपुरधामस्थित मुक्ति विकास बैंकका ३ जनामा संक्रमण पुष्टि भएको हो। यस अघि पनि मुक्तिनाथ विकास बैंकका केही कर्मचारीमा कोरोना संक्रमण पुष्टि भएको थियो।
त्यसैगरी जनकपुरधाम उपमहानगरमा २२, मिथिला बिहारी नगरपालिकामा १, बटेश्वर गाउँपालिकामा १, हंसपुर नगरपालिकामा १, मुखियापट्टी मुसहरनिया गाउँपालिकामा १, जमुनीवासमा १, मिथिला नगरपालिकामा ६, धनौजी गाउँपालिकामा १ र लक्ष्मीनिया गाउँपालिकामा ३ जनामा कोरोना संक्रमण पुष्टि भएको प्रादेशिक जनस्वास्थ्य प्रयागशालाले जनाएको छ।