प्रधानमन्त्री केपी ओली र प्राध्यापक केआर खम्बू झापाको वामपन्थी आन्दोलनदेखि नजिकका साथी हुन्। यी दुई भूमिगत राजनीतिमा सँगसँगै हिँडेका थिए। प्रधानमन्त्री निवास बालुवाटारमा बिहीबार आयोजित कार्यक्रममा प्रधानमन्त्री ओलीले तिनै पुराना दिन सम्झिँदै भने, 'म र खम्बू घाम र धूलो सँगसँगै खेपेका साथी हौं।'
प्रधानमन्त्री निवास बालुवाटारमा बिहीबार आयोजित कार्यक्रममा खम्बूको आत्मसंस्मरण 'छायाँको लस्कर' सार्वजनिक गर्ने क्रममा साे भनाइ राखेका हुन्। उनले थपे, 'पुस्तकले मलाई विगतका संघर्षशील दिनहरू सम्झना गरायो।'
प्रधानमन्त्रीले आफ्नो लामो मन्तव्यको क्रममा भने, ‘यो पुस्तकको नाम छायाँको लस्कर छ। यहाँ अनुहारहरूको कुरा छैन छायाँको कुरा छ किनभने खम्बूजीको स्मृतिमा अहिले अनुहारहरू होइनन् छायाँहरू छन्। उहाँले तपाईं हामी कसैलाई पनि वा खुद उनकी जीवनसाथी शुभलक्ष्मीलाई पनि छायाँको रुपमा मात्र महसुस गर्न सक्नु हुन्छ।'
नेत्र-ज्योति गुमेका प्राध्यापक केआर खम्बूको वर्तमान अवस्थालाई संकेत गर्दै प्रम ओलीले भने ‘तर खम्बूजीले देख्न छोड्नु भएको छैन। उहाँको अन्तरदृष्टि खुलस्त छ।‘ प्रधानमन्त्रीको प्रतिक्रिया सुनिरहेका लेखक केआर खम्बू शीर हल्लाउँदै सहमती दर्शाइरहेका देखिन्थे।
मन्तव्यका क्रममा प्रधानमन्त्री ओलीले आफ्नो परिचित शैलीमा केआर खम्बूसँगको संगत र निकटताको प्रसंग कोट्याउँदै केही रोचक क्षणहरूको सम्झना गरे। उनका रोचक प्रसंगले सभा हलमा हाँसोको लहर फैलेको थियो।
‘यो किताबमा उहाँको संघर्षशील जीवनको गाथा, व्यथा प्रकट भएको छ । झापा आन्दोलन, त्यसको विस्तार साथै कोअर्डिनेसन कमिटी बनाउँदा ताकादेखि खम्बूजीसँग मेरो संगत हो। तर यो पुस्तकमा मेरो मात्र होइन धेरैको कथा समेटिएको छ।'
कार्यक्रमा पुस्तक 'छायाँको लस्कर' र लेखकका बारेमा प्राध्यापक जङ्गब चौहानले परिचयात्मक टिप्पणी गरेका थिए। विराटनगरमा क्याम्पस पढ्दाका दिनहरू सम्झँदै केआर खम्बू आफ्नो मन मिल्ने सहपाठी भएको बताए।
छायाँको लस्करमा लेखकले भोगेको समय र राजनैतिक परिघटनालाई समेटेका छन्। त्यसैले यो एउटा राजनैतिक दस्तावेज त हो नै। तर यो एउटा उत्कृष्ट साहित्यिक कृति पनि होु प्राध्यापक जङ्गब पुस्तक बारे आफ्नो धारणा राख्दै थिए।
'पुस्तक लेखकको जीवनका भोगाइको वरपर घुमेको र यसका मूल पात्रहरू त्यसबेलाका माले, एमालेका नेताहरू छन्। तर सरल अनि रसिलो भाषाले पुस्तक पढ्दा साहित्यिक कृतिको आनन्द आउँछ।' पुस्तकका बारेमा प्राध्यापक जङ्गबको थप टिप्पणी थियो । जङ्गबले आफ्नो मन्तव्यको अन्तमा रुसी कवि पुस्किनको छोटो कविता लेखक खम्बूलाई समर्पण गर्दै सुनाएका थिए ।
प्रधानमन्त्रीबाट आफ्नो पुस्तक सार्वजनिक गराउन पाएकोमा आफू प्रफुल्ल भएको जानकारी गराउँदै प्राध्यापक खम्बूले किताबको रचनागर्भबारे जानकारी दिए।
नेपालयकातर्फबाट भूषिता वशिष्ठले प्रकाशकीय धारणा राख्दै पुस्तकका लेखकको संगतका बेला कालीचरणका नाममा प्रधानमन्त्री ओलीले लेखेको कविता पनि वाचन गरेकी थिइन्। सो कविता ‘छायाँको लस्कर’मा संकलित छ।
नेपालयले प्रकाशन गरेको 'छायाँको लस्कर' ३७० पृष्ठको पुस्तकको मूल्य ५४५ रुपैँया रहेको छ।
नेपाली चाड दसैंको छेक पारेर कवि तथा गीतकारहरू कालीप्रसाद रिजाल, मञ्जुल र तीर्थ श्रेष्ठका तीन फरक पुस्तकहरू यही शुक्रबार, शनिबार र आइतबार आयोजना हुने सांगीतिक कार्यक्रम पलेँटीमा सार्वजनिक गरिने जानकारी नेपालयले गराएको छ।
