अभिनेता सौगात मल्ल र अभिनेत्री सृष्टि श्रेष्ठ फेरि एकसाथ पर्दामा देखिँदैछन्। यी दुईको मुख्य अभिनय रहेको फिल्म 'भाइरल गोर्खे' माघ १ गतेदेखि देशव्यापी प्रदर्शन तयारीमा छ।
सौगात र सृष्टिका अनुसार फिल्मले सामाजिक सञ्जालको सकारात्मक-नकारात्मक प्रभावलाई कमेडीका माध्यमबाट प्रस्तुत गर्नेछ। उनीहरूका अनुसार समसामयिक विषयस्तुमा आधारित फिल्ममा समाजिक सञ्जालमा भाइरल हुने पात्रको यात्रा, त्यसपछि आउने चुनौती र त्यसले सिकाउने पाठलाई फिल्मले प्रस्तुत गर्छ।
काठमाडौंमा फिल्मबारे जानकारी दिन आयोजित कार्यक्रममा बोल्दै अभिनेता सौगात मल्लले 'भाइरल गोर्खे' ले भाइरल हुने प्रक्रिया, त्यसपछिको जीवन र भोगाइलाई केन्द्रमा राखेको बताए।
'व्यक्ति कसरी भाइरल हुन्छ। मेरो पात्रलाई भाइरल भन्न पनि आउँदैन। भाइरस-भाइरस भनिरहेको हुन्छ,' उनले भने, 'त्यो अवस्थादेखि साँच्चिकै भाइरल हुनेसम्मको यात्रा, त्यसपछि भोग्नुपर्ने दुख र चुनौती, अनि त्यसबाट उसले के सिक्छ भन्ने कुरा फिल्मले देखाउँछ।' फिल्ममा दर्शकले हाँसोसँगै मन छुने दृश्यहरू पाउने उनले बताए।
फिल्म किन छनोटमा पर्यो भन्ने प्रश्नमा सौगात भन्छन्, 'यदि टिकटकको विषय मात्रै भएको भए सायद गर्दैनथेँ। म आफैं टिकटक प्रयोग पनि गर्दिन्। चासो पनि थिएन।' तर स्क्रिप्ट र स्क्रिनप्लेले आफूलाई तानेको उनले बताए।
अगाडि भने, 'यो टिकटकको कथा मात्रै होइन्। धेरैको कथा हो। पात्रको पीडा, घरव्यवहार, व्यक्तिगत जीवन। आज एक्कासी माथि पुग्ने र फेरि तल झर्ने अवस्थासम्मका चुनौती देखाइएका छन्। सबै कुरा छ भनेपछि किन नगर्ने भनेर यो फिल्म खेलेँ।'
भाइरल भइसकेपछि आउने चुनौतीहरू र त्यसबाट आउने सन्देशले फिल्मलाई अर्थपूणै बनाएको उनको भनाइ छ। 'साँच्चै भन्नुपर्दा मलाई यसको स्क्रिनप्लेले छोयो। जो-कोही कलाकारले पनि यसमा नाइँ भन्नुहुँदैनथ्यो भन्ने लाग्छ', उनले भने।
अभिनेत्री सृष्टिले 'भाइरल गोर्खे' अहिलेको समयसँग सान्दर्भिक कथा भएको बताइन्। 'भाइरल हुन मान्छेले के-के गर्छ भन्ने कुरा छ, तर सबै कुरा रिलेटेबल छन्। कमेडीको थ्रु देखाइएकाले लाइट हार्टेड फिल्म जस्तो लाग्छ', उनले भनिन्।
सामाजिक सञ्जाल विशेषगरी टिकटकको पृष्ठभूमिमा बनेको कथाले वर्तमान समय बोल्ने सृष्टिको भनाइ छ। आफ्नो भूमिकाबारे बोल्दै उनले भनिन्, 'म आफैं टिकटक खास्सै चलाउँदिनथेँ। तर फिल्ममा मेरो पात्र टिकटक स्टार हुन्छ। क्यारेक्टर पनि फरक छ, त्यसैले काम गर्न चाख लाग्यो।'
निगम श्रेष्ठको लेखन तथा निर्देशन रहेको 'भाइरल गोर्खे' मा सौगात र सृष्टिसहित बुद्धि तामाङ, लक्ष्मी गिरी, राजाराम पौडेल, सपना चौधरी, अर्जुन पोखरेल, सुनिल तामाङ, विकास लामा, ऋषि धमला, मिस पबी, धुर्व थापा, बारिश सोनालगायत कलाकारहरूको अभिनय छ।
-1756446574.jpg)
-1746009348.jpg)
