दिपेन्द्र के खनाल निर्देशित फिल्म 'पशुपति प्रसाद २: भष्मे डन' को ट्रेलर सार्वजनिक भएको छ।
सोमबार ललिपुरस्थित लाबिम मलमा एक कार्यक्रम आयोजना गर्दै फिल्मको ट्रेलर सार्वजनिक गरिएको हो। फिल्ममा सात वर्षपछि विपीन कार्की 'भष्मे डन' को जीवनमा आउने उतारचढाबलाई देखाइने छ।
कार्यक्रममा बोल्दै निर्देशक खनालले भने, 'दर्शकले जसरी पशुपति प्रसादलाई मनमा राख्नु भएको छ यसलाई पनि माया दिनुहुन्छ भन्ने आशा छ। हामीले बनाउने खोजेको जस्तै फिल्म बनेको छ त्यसैले यो फिल्मलाई पनि माया गर्नुहुन्छ भन्ने विश्वास छ।'
अभिनेता विपीन कार्कीले भने, 'मैले भष्मे डनलाई पात्रको रूपमा मात्रै हेरेको छैन। भष्मे डन मेरो पहिचान हो, भष्मे डन भनेर परिचित हुँदा मलाई गर्व लाग्छ।'
फिल्मकी अभिनेत्री स्वस्तिमा खड्का भन्छिन्, 'अभिनेत्रीहरूले फरक फरक प्रस्तुति गर्ने अवसर एकदमै कम पाउँछन्। मैले यो फिल्ममा मात्र नभएर दिपेन्द्र दाइको अन्य फिल्ममा पनि नयाँ प्रस्तुति दिने अवसर पाएकी छु। दुर्गा माताको भूमिका जोखिमपूर्ण थियो। यस पात्रलाई कतिको न्याय गर्न सकेकी छु भन्ने फिल्म प्रदर्शन भएपछि थाहा होला? यो पात्र निर्वाह गर्न अवसर दिनु भएको सम्पूर्ण निर्माण टिमलाई धन्यवाद दिन चाहन्छु।'
टुकी आर्टस् ब्यानरमा निर्माण भएको फिल्ममा विपीन कार्की, सौगात मल्ल, स्वस्तिमा खड्का, वर्षा सिवाकोटी, प्रकाश घिमिरे, रविन्द्र सिंह बानियाँ, सजन थापा मगर, प्रकाश दाहाल, विशु पौडेल, माओत्से गुरुङ, लोकेन्द्र लेखक, विशाल पहारी, घनश्याम जोशीलगायत कलाकारको अभिनय छ।
फिल्मको कथा खगेन्द्र लामिछानेले लेखेका हुन्। फिल्मको निर्माता पनि खगेन्द्र स्वयम् हुन्।
कृष्णबहादुर थापाले छायांकन गरेको फिल्मलाई बनिष शाहले सम्पादन गरेका छन्। यो फिल्म आगामी दशैंको फूलपाती असोज ४ गतेदेखि प्रदर्शन हुनेछ।
२०७३ सालमा रिलिज भएको फिल्म ‘पशुपति प्रसाद’ को स्पिन–अफको शीर्ष भूमिकामा विपीन कार्की छन्। ‘पशुपति प्रसाद’ मा उनले भष्मे डनकै भूमिका निर्वाह गरेका थिए।
