रामबाबु गुरूङ निर्देशित फिल्म 'कबड्डी ५: आफ्टर द फाइनल म्याच'ले बक्स अफिसमा उत्साहजनक व्यापार गरेको छ। शुक्रबारदेखि प्रदर्शनमा आएको फिल्मले पाँच दिनमा सात करोड रूपैयाँभन्दा बढीको ग्रस कलेक्सन गरेको निर्माणपक्षले जनाएको छ।
प्रस्तुतकर्ता बाँसुरी फिल्म्सका अनुसार मंगलबारसम्म फिल्मको कुल ग्रस कमाइ सात करोड रूपैयाँ नाघेको हो। यद्यपि, यो निर्माणपक्षले सार्वजनिक गरेको व्यापारिक विवरण हो।
फिल्मले सुरूआतदेखि नै दर्शकको उल्लेख्य साथ पाएको थियो। फिल्मले दर्शकबाट प्रतिक्रिया भने मिश्रित पाइरहेको छ। कतिपय दर्शकले फिल्मको कथा र प्रस्तुतिलाई रूचाएका छन् भने कतिपयले अपेक्षाअनुसार नभएको प्रतिक्रिया दिएका छन्। यद्यपि, मिश्रित प्रतिक्रियाकाबीच पनि फिल्मको व्यापार बलियो देखिएको छ।
'कबड्डी' शृंखलाको पाँचौं फिल्ममा यसअघिका परिचित पात्रसँगै नयाँ अनुहार पनि थपिएका छन्। फिल्ममा दयाहाङ राई, विपिन कार्की, विजय बराल, बुद्धि तामाङ, रिश्मा गुरूङ, सिर्जना गुरूङ, मिरूना मगरलगायत कलाकारहरूको अभिनय छ।
फिल्मको निर्मातामा रामबाबु गुरूङ, मणिराम पोखरेल, मधु मिजार र विशाल गुरूङ (एलजी) छन्।
