लक्ष्मण सुवेदी निर्देशित फिल्म 'सतीदेवी' को फर्स्टलुक पोस्टर सार्वजनिक भएको छ। सार्वजनिक पोस्टरमा अभिनेत्री मलिका महतलाई प्रस्तुत गरिएको छ।
पोस्टरमा कालो मोसो र जुत्ताको माला लगाएकी उनलाई केही व्यक्तिहरूले लखेटिरहेको देख्न सकिन्छ। फिल्ममा उनी सतीदेवी पात्रको रूपमा देखिने छिन्।
निर्देशक सुवेदीका अनुसार फिल्मको नाम सतीदेवी भएपनि हिन्दु धर्मकी देवी सतीदेवीबारे हुने छैन। फिल्मले एक ग्रामीण युवतीको संघर्षको कथा भन्नेछ।
लक्ष्मण सुवेदीको निर्देशन, निर्माण तथा लेखनमा बन्ने फिल्ममा मलिकासँगै भोलाराज सापकोटा, कुलदीप अधिकारी, मनिषा सापकोटालगायत कलाकारको अभिनय रहनेछ।
यो फिल्मको प्रदर्शन मिति भने तय गरिएको छैन।
