अभिनेत्री समृद्धि अर्यालले आफू अभिनीत फिल्म 'वरिष्ठ बलराम' मा आफ्नो भूमिका प्रभावशाली रहेको बताएकी छन्।
उनले फिल्ममा आफ्नो उपस्थिति महत्वपूर्ण स्थान र समयमा हुने बताइन्। उनले भनिन्, 'म जहाँ-जहाँ आउँछु, त्यहाँ इम्प्याक्टफुल भूमिका छ भन्ने लाग्छ।'
उनले आफूले दुई मुख्य पात्रलाई प्रभाव पार्ने खालको भूमिका निर्वाह गर्न पाएको बताइन्। अभिनेता विजय बरालको अपोजिटमा काम गरेकी समृद्धिले फिल्ममा विजयको ‘जोन’ मा नै रहेर काम गर्ने प्रयास गरेको बताएकी छन्।
'विजय बराल र दयाहाङ राई दुवै जना अग्रज र अब्बल अभिनय गर्ने कलाकार हुनुहुन्छ, उहाँहरूको बोली पनि त्यस्तै राम्रो छ, त्यसैले चुनौती त पक्कै थियो,' उनी भन्छिन्, 'तर मेरा लागि यो फिल्म सिक्ने मौका बन्यो।'
सुरूमा फिल्मका लागि अफर आउँदा कलाकारका रूपमा दयाहाङ र विजयको नाम सुन्दा आफूले काम गर्न सक्छु र भन्ने लागेको तर पछि यो काम सिक्ने अवसर पनि हो भन्ने सोचेर स्वीकार गरेको उनको भनाइ छ।
पहिलो फिल्म 'फर्की फर्की' मा काम गर्दा धेरै नयाँ कलाकार भएकाले काम गर्न सहज भए पनि 'वरिष्ठ बलराम' मा भने अग्रज एवं अभिनयमा पारंगत कलाकार भएकाले संकोच र सिकाई दुवै भएको उनले बताइन्।
यद्यपि, फिल्ममा आफू शो पिस मात्रै नरहेको उनको दाबी छ। दुई अग्रज र अब्बल कलाकारको बीचमा आफ्नो पनि राम्रो भूमिका रहेको उनको भनाइ छ। 'बलरामको क्यारेक्टरको यात्रामा सहयोग गर्ने इम्प्याक्टफुल क्यारेक्टर छ,' समृद्धिले थपिन्।
आफ्नो सिने करियरको यात्रामा 'वरिष्ठ बलराम' को 'क्यारेक्टर' ले सहयोग गर्ने उनको भनाइ छ। कुशुमको भूमिकामा देखिने उनले भनिन्, 'यो क्यारेक्टर भोलि कति लोकप्रिय हुन्छ, त्यो त थाहा छैन। तर, दर्शकले सम्झिने खालको छ भन्ने लाग्छ।'
'वरिष्ठ बलराम' सुरेन्द्र पौडेलले निर्देशन गरेका हुन्। कात्तिक ६ गते भाइटीकाको दिन रिलिज हुने फिल्ममा दयाहाङ राई, विजय बराल, समृद्धि अर्याल, पशुपति राई, माओत्से गुरूङ, भोलाराज सापकोटा, रामबाबु रेग्मी, प्रदीप कुमार चौधरी (पीके) लगायत कलाकारहरूको अभिनय छ।
-1746009348.jpg)
