फिल्म 'अभिमन्युः च्याप्टर १' ले प्रिमियरमा सकारात्मक प्रतिक्रिया पाएको छ। सोमबार साँझ ललितपुरस्थित लविम महलको क्युएफएक्समा आयोजित प्रिमियरमा फिल्मले दर्शक तथा कलाकर्मीहरूबाट सकारात्मक प्रतिक्रिया बटुलेको हो।
फिल्म हेर्नेहरूले यसको ‘सरप्राइजिङ’ कथा, वाचन शैली र कलाकारहरूको अभिनयको प्रशंसा गरेका छन्। प्रिमियरमा उपस्थित अधिकांशले यो ‘सस्पेन्स थ्रिलर’ फिल्मले दर्शकलाई अन्तिमसम्म बाँधेर राख्ने प्रतिक्रिया दिए।
अभिनेता दिव्यदेव पन्तले फिल्मको कथावस्तु, निर्देशन र अभिनय पक्षको प्रशंसा गरे। उनले भने, 'सामान्यतया फिल्ममा महिला पात्रलाई जसरी देखाइन्थ्यो, त्यो परम्परालाई यो फिल्मले तोडेको छ। निर्माता विनोद पौडेलले ‘पूर्णबहादुरको सारंगी’ मा जस्तै यसमा पनि बजारमा नाम चलेका 'स्टार' खोज्नुको साटो प्रतिभावान तर ओझेलमा परेका (अन्डररेटेड) कलाकारहरूलाई विश्वास गर्नुभएको छ।'
निर्देशक शोभित बस्नेतले अहिले अनुहारभन्दा अभिनय र प्रतिभा बिक्ने समय आएको धारणा राखे। उनले भने, 'फिल्मले दर्शकलाई मज्जाले अन्तिमसम्म बाँधेर राख्छ। हरेक क्षण अब के हुन्छ भन्ने कौतूहल फिल्ममा देखिन्छ।'
मोडल तथा अभिनेत्री अलिशा बास्तोला र रूषा न्यौपानेले नेपालमा चलिरहेको ट्रेन्डभन्दा फरक फिल्म आएको भन्दै दर्शक नपछुताउने दाबी गरे। हास्य कलाकार भरतमणी पौडेलले फिल्मले दाइजो प्रथाजस्तो गम्भीर सामाजिक विषयवस्तुलाई सस्पेन्स शैलीमा उठाएको बताए।
प्रिमियरपछि अभिनेता कामेश्वर चौरसिया भावुक देखिए। लामो संघर्षपछि मुख्य भूमिका निर्वाह गर्न पाएकोमा खुसी व्यक्त गर्दै उनले भने, 'कलाकार बन्नका लागि स्क्रिप्ट नै चाहिँदो रहेछ। अहिलेसम्म मैले जति काम गरेँ, सबैले सराहना गर्नुभयो तर मुख्य चरित्रका लागि एउटा बलियो लिखित दस्तावेज नै चाहिन्छ। जे गरेँ, यहाँ आइपुग्नकै लागि रहेछ।'
अभिनेत्री लक्ष्मी बर्देवाले सुत्केरी हुने अवस्था (गर्भावस्था) कोसमयमा पनि फिल्मको स्क्रिप्ट र टिम उत्कृष्ट लागेर काम गरेको खुलासा गरिन्। 'सुरूमा स्क्रिप्ट पढ्दाभन्दा पर्दामा फिल्म हेर्दा अझ राम्रो बनेको पाएँ,' उनले भनिन्।
अर्की अभिनेत्री सरिता गिरीले पुरूष प्रधान फिल्महरू बनिरहेको समयमा ‘अभिमन्यु’ महिला केन्द्रित फिल्म बनेको र त्यसमा पुरूष पात्रहरूले दरिलो साथ दिएको देख्दा खुसी लागेको बताइन्। किरण श्रेष्ठले दिग्गज कलाकारहरूसँग काम गर्न पाउनु आफ्नो लागि सुखद अनुभव रहेको बताए।
सुशान्त गौतम निर्देशित 'अभिमन्युः च्याप्टर १' यही बिहीबारदेखि प्रदर्शनमा आउँदैछ। सेभेन सिज सिनेमाको प्रस्तुति रहेको फिल्ममा कामेश्वर चौरसिया, लक्ष्मी बर्देवा, सरिता गिरी, किरण श्रेष्ठ, गौमाया गुरूङ, प्रकाश दाहाल, शिशिर वाङ्देल मुख्य भूमिकामा छन्।
विनोद पौडेल र गुञ्जन गिरी निर्माता रहेको फिल्मको लेखन मुकेश खनालले गरेका हुन्।
मदन थापा क्रिएटिभ निर्देशक रहेको फिल्ममा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ कार्यकारी निर्माता छन्। रमेश चौलागाईं र हरि श्रेष्ठ सह–निर्माता रहेको सिनेमाको लाइन प्रोड्युसरमा जीवन शाक्य छन्।
शरद महतोको डिओपी, मनोज श्रेष्ठको भिएफएक्स, जुनिम गहतराजको रंग संयोजन र मदन घिमिरेको सम्पादन रहेको यो फिल्म नेपाली र हिन्दी दुवै भाषामा नेपालसहित विश्वव्यापी रूपमा प्रदर्शन गरिँदैछ।
-1746009348.jpg)
