मंसिर १८ गतेदेखि प्रदर्शनमा आएको फिल्म 'अभिमन्युः च्याप्टर १' को व्यापार कमजोर देखिएको छ।
चलचित्र विकास बोर्डले सोमबार सार्वजनिक गरेको ९ औं दिनसम्मको बक्स अफिस रिपोर्टअनुसार फिल्मले २१ लख १० हजार २०५ रूपैयाँ ग्रस कमाइ गरेको हो। गत शनिबारसम्म फिल्मको ६ हजार ६८६ वटा टिकट बिक्री भएको विवरणमा उल्लेख छ।
कामेश्वर चौरासिया र लक्ष्मी वर्देवा अभिनीत यो फिल्म हेरेका दर्शक तथा समीक्षकहरूबाट राम्रो प्रतिक्रिया मिलेको थियो। क्राइम सस्पेन्स विधामा बनेको फिल्मको कथावस्तु, प्रस्तुति, कलाकारको अभिनय र प्राविधिक पक्ष राम्रो रहेको भन्दै प्रिमियर शोदेखि नै यसको तारिफ भएको थियो। फिल्मले दर्शकलाई सुरूदेखि अन्त्यसम्म बाँधेर राख्ने धेरैले प्रतिक्रिया दिएका थिए। यद्यपि, राम्रो प्रतिक्रियाका बाबजुद फिल्मको व्यापार निराशाजनक देखिएको हो।
सुशान्त गौतमको डेब्यु निर्देशन रहेको फिल्मले तराई-मधेसको परिवेशमा दाइजो प्रथा र त्यसले निम्त्याउने अवस्थालाई रोचक तरिकाले पर्दामा उतारेको छ। फिल्ममा कामेश्वर र लक्ष्मीसहित किरण श्रेष्ठ, गौमाया गुरूङ, सरिता गिरी, प्रकाश दाहाल, शिशिर बाङदेल लगायतका कलाकारको अभिनय छ। अभिनेत्री रेखा थापा अतिथि भूमिकामा छिन्।
मुकेश खनालको लेखन रहेको फिल्मको 'क्रिएटिभ डिरेक्टर' मदन थापा हुन्। फिल्मको निर्माता विनोद पौडेल र गुञ्जन गिरी हुन्। अहिले धेरै हलबाट फिल्म उत्रिसकेको छ।
-1763886130.jpeg)
-1746009348.jpg)
