नेपाली सिरियलका चर्चित निर्देशक तथा कलाकार दमन रूपाखेती टिभी शृंखला 'मेरी बास्सै' मा पुनः फर्किएका छन्।
सिरियलको सुरूआती निर्देशकसमेत रहेका उनी चार वर्षपछि निर्देशक तथा कलाकारको रूपमा पुनरागमन गरेका हुन्। उनको आगमनपछि सिरियलको ३ भाग दर्शकमाझ आइसकेको छ।
यसअघि 'मेरी बास्सै' को निर्देशक राजु पौडल (राजु मास्टर) थिए। पहिले लामो समयसम्म यो सिरियलमा काम गरेका उनी पछिल्ला वर्ष अन्य र आफैले पनि सिरियल ल्याउन थालेपछि ‘मेरी बास्सै’ छाडेका थिए।
गत भदौंमा सिरियलको निर्देशक र कलाकारको भूमिकामा पुनः जोडिएका उनी झन्डै तीन महिनामा सिरियलबाट अलग भएका हुन्। आपसी सहमतिमै उनी सिरियलबाट अलग भएको बताइएको छ।
दमनले सुरूमा 'मेरी बास्सै' को ८० भागसम्म निर्देशन गरेका थिए। त्यसपछि उनले 'झ्यानाकुटी' र 'हाक्काहाक्की' सिरियल ल्याएका थिए।
पुनः ६ सय ६३ देखि ७ सय ६३ भागसम्म 'मेरी बास्सै' निर्देशन तथा अभिनय गरेका दमन झन्डै चार वर्षपछि सिरियलमा फर्किएका हुन्।
दमनले भने, 'अब नछोडने निर्णयसहित सिरियलमा जोडिएको छु।'
उनले समसामयिक विषयवस्तुमा केन्द्रित रहेर युवापुस्तालाई समेत लक्षित गरेर सिरियल ल्याउने योजना रहेको बताए।
'युवालाई समेत आकर्षित गर्नेगरी सिरियल ल्याउनुपर्छ। हरेक एपिसोड १० लाखभन्दा बढी भ्युज पुर्याउने योजना हो', दमनले भने।
मिडिया हबको प्रस्तुति रहेको 'मेरी बास्सै' नेपालको पुरानो र चर्चित हास्य सिरियल हो।
अहिले सिरियलमा दिवाकर भण्डारीको लेखन तथा लेखान्त भुसालको एपिसोड निर्देशन रहँदै आएको छ।
'मेरी बास्सै' मा सुरवीर पण्डित, रामचन्द्र अधिकारी, पल्पसा डंगोल, दमन रूपाखेती, दिवाकर भण्डारी, उत्तम केसी, सुरेन्द्र केसी, साया भण्डारी, यादव थापा, लेखान्त भुसाललगायतको अभिनय रहँदै आएको छ।
-1756446574.jpg)
-1746009348.jpg)
