अभिनेता अर्पण थापाको निर्देशनमा फिल्म 'फ्रेन्च किस' निर्माण हुने भएको छ। ए.टी.एफ. प्रोडक्सन प्रा.लि.को ब्यानरमा निर्माण हुन लागेको फिल्मको शुक्रबार काठमाडौंमा घोषणासँगै शुभमुहूर्त गरिएको हो।
फिल्मको छायांकन सोमबारबाट चितवनमा सुरू हुनेछ। 'फ्रेन्च किस' मा अर्पण स्वयंसँगै अन्तर्राष्ट्रियस्तरमा चर्चा कमाएको फिल्म ‘शाम्बाला’ बाट चर्चामा आएकी अभिनेत्री थिन्ले ल्हामोको मुख्य अभिनय रहनेछ।
फिल्ममा अन्तर्राष्ट्रिय मञ्चमा नेपालको नाम चम्काएकी थिन्ले र भर्सटायल अभिनेता अर्पण थापाको अनस्क्रिन जोडी देखिनेछ। साथमा अभिनेत्री गौरी मल्ल र आयशा तामाङको पनि फिल्ममा मुख्य भूमिका रहनेछ।
फिल्मको कार्यकारी निर्मातामा सौगात बस्नेत र सह–निर्मातामा सुभाष बी. शाही छन्। अनुभवी छायांकन सुदीप बरालले यो फिल्म खिच्नेछन्। त्यस्तै, फिल्ममा संगीत चर्चित गायक तथा संगीतकार दीपक बज्राचार्यको रहनेछ।
रोयल भीमसेन (ट्राइडेन्ट कन्सेप्ट)ले पब्लिसिटी डिजाइनको जिम्मा लिएको यो फिल्म सन् २०२६ भित्रमा प्रदर्शनमा ल्याउने लक्ष्य राखिएको छ। शीर्षकले नै फिल्म युवापुस्ता र प्रेमकथामा आधारित हुनसक्ने अनुमान लगाउन सकिन्छ।
-1746009348.jpg)
