पछिल्लो समय नेपाली फिल्ममा निरन्तर नयाँ निर्देशकको प्रवेश भइरहेका बेला निर्देशक बलिराम चौहान भने आफूलाई दीर्घ यात्राका लागि तयार गरिरहेको बताउँछन्। यही शुक्रबारदेखि उनी निर्देशित फिल्म 'द ब्लु लाइट' प्रदर्शनमा आउँदैछ।
चौहानले आफ्नो फिल्म रातारात चम्किने वा हराउने खालको नभएका बताए। ट्रेलर सार्वजनिक भएसँगै यसलाई हरर जनराको फिल्मका रूपमा समेत अनुमान गरिएको थियो। निर्देशक चौहान त्यसलाई पूर्ण रूपमा अस्वीकार गर्छन्। उनी भन्छन्, 'हाम्रो फिल्म हरर त होइन। तर केही दृश्यहरूले डरको अनुभूति भने पक्कै गराउनेछन्।'
उनले 'द ब्लु लाइट' लाई साधारण मनोरञ्जनभन्दा फरक अनुभूति दिने फिल्मको रूपमा व्याख्या गर्छन्।
''द ब्लू लाइट' एक मनोवैज्ञानिक ड्रामा-थ्रिलर हो। यो केवल हेर्ने फिल्म मात्र होइन, अनुभूति गर्ने फिल्म हो', चौहानले भने, 'यसले मानव मन, एक्लोपन र वास्तविकता तथा भ्रमबीचको सूक्ष्म रेखालाई अन्वेषण गर्छ।'
यो फिल्ममा कलाकारहरूको बाक्लो उपस्थितिलाई लिएर भूमिका बाँडफाँटमा कठिनाइ आएको हो कि भन्ने जिज्ञासामा उनले सबै कलाकार सन्तुष्ट रहेको दाबी गरे।
'त्यस्तो खासै कठिनाइ आएन', उनी भन्छन्, 'सबैलाई मन पर्ने पात्र नै पाउनुभएको छ। रेगुलर गर्दै आएका पात्रभन्दा फरक र प्रभावशाली भूमिका भएकाले हरेक कलाकार खुशी हुनुहुन्छ।'
डेब्यु निर्देशकहरू छिट्टै हराउने ट्रेन्डतर्फ संकेत गर्दा चौहान भने आफूलाई अलग धारमा राख्छन्।
'सबैको यात्रा र गन्तव्य फरक हुन्छ', उनले भने, 'मैले दिने योगदान पनि फरक हुन्छ। म आफूलाई लामो यात्राका लागि तयार गरिरहेको छु। मलाई न रातारात चम्किनु छ, न त हराउनु नै छ।'
प्रेम, धोका र बदलाको कथावस्तु नयाँ नभए पनि फिल्मले दर्शकलाई बाँधिराख्ने उनको भनाइ छ।
'विषयवस्तु नयाँ नभए पनि हामीले त्यसलाई नयाँ शैलीमा प्रस्तुत गरेका छौं', चौहान भन्छन्, 'पात्रहरूका संवेग र भावनाहरू उच्च संवेदनशील छन्, जसले दर्शकलाई फरक अनुभव दिने आशा गरेका छौं।'
फिल्म हिरो को भन्ने प्रश्नमा निर्देशक स्पष्ट देखिन्छन्। 'बेनिशा हमाल र अर्पण थापा दुवै हिरो हुन्', उनले भने, 'कथा उनीहरूकै वरिपरि घुम्छ।'
'द ब्लु लाइट' यही माघ १६ गतेदेखि प्रदर्शनमा आउने तयारीमा छन्। फिल्ममा बेनिशा र अर्पणसहित आयुष्मान देशराज जोशी, सृष्टि श्रेष्ठ, महेश त्रिपाठी, सुरक्षा इटानीलगायत कलाकारहरूको अभिनय छ।
स्काइफल पिक्चर्सले प्रस्तुत गरेको 'द ब्लु लाइट' को सह निर्मातामा भोलानाथ कटुवाल र रमन ग्रे रहेका छन् । कार्यकारी निर्माता भने छायाँकार नरेन्द्र मैनाली र नायिका बेनिशा हमाल हुन्।
-1746009348.jpg)
