फिल्म 'कल्ली' पूर्वनिर्धारित मितिमा रिलिज नहुने भएको छ।
निर्माताले एक विज्ञप्ति जारी गर्दै फिल्म फागुन १ गते प्रदर्शनमा नआउने भएको जानकारी दिएका हुन्। देशको राजनीतिक परिस्थितिलाई ध्यानमा राखेर यस्तो निर्णय गरिएको निर्माताले जनाएका छन्।
'वर्तमान परिस्थितिमा देश निर्वाचनमा होमिएको छ। राष्ट्रको भविष्य के हुने हो भन्ने महत्वपूर्ण र जटिल घडीमा सम्पूर्ण नागरिकको ध्यान र राज्यको प्राथमिकता देशको राजनीति र निर्वाचनतर्फ केन्द्रित हुनु स्वाभाविक र आवश्यक पनि हो', विज्ञप्तिमा भनिएको छ, 'देशको यो संवेदनशील समयलाई सम्मान गर्दै हामीले फागुन १ गतेको प्रदर्शन मितिलाई हालका लागि स्थगित गर्ने निर्णय गरेका छौं। मुलुकमा नयाँ सरकारको गठन र निर्वाचनपछिको सहज वातावरण बनेलगत्तै हामी ‘कल्ली’ को नयाँ प्रदर्शन मिति घोषणा गर्नेछौं।'
किरण नेपाली निर्माता रहेको 'कल्ली' लक्ष्मण सुनारले निर्देशन गरेका हुन्। फिल्ममा सौगात मल्ल, उत्तम प्रधान, अर्पण थापा, बेनिशा हमाल, नाजिर हुसेन, वर्षा राउत, सुलक्षण भारतीलगायत कलाकारहरूको अभिनय छ।
-1746009348.jpg)
