फिल्म 'द ब्लु लाइट' ले प्रिमियरमा राम्रो प्रतिक्रिया पाएको छ।
बिहीबार साँझ काठमाडौंमा आयोजित प्रिमियरमा सहभागी दर्शक, कलाकार तथा फिल्मकर्मीहरूले यसको कथावस्तु, प्रस्तुति र प्राविधिक पक्षको खुलेर प्रशंसा गरेका हुन्।
साइकोलोजिकल थ्रिलर जनरामा निर्माण गरिएको 'द ब्लु लाइट' लाई नेपालमा बनेका सीमित उत्कृष्ट थ्रिलर फिल्ममध्ये एक मानिएको प्रतिक्रिया प्रिमियरपछि आएको छ।
पछिल्लो समय एकै खालका फिल्म निर्माण भइरहेको भन्ने गुनासोबीच फरक स्वाद र नयाँपन बोकेर आएको भन्दै फिल्म हेर्नेहरूले यसको तारिफ गरेका हुन्। कतिपयले फिल्मको 'ब्याकग्राउन्ड स्कोर' (पाश्र्व संगीत) ले थ्रिलर मुडलाई अन्त्यसम्म कायम राखेको प्रतिक्रिया दिए।
अभिनय, निर्देशन र मेकिङ पक्षलाई समेत प्रभावशाली बताइएको छ। विशेषगरी खलपात्रको भूमिकामा देखिएकी सृष्टि श्रेष्ठको अभिनयको खुलेर प्रशंसा गरिएको छ।
प्रिमियरपछि बोल्दै कलाकार तथा निर्देशक दीपक आचार्य (काकु) ले फिल्मलाई फरक स्वादको उत्कृष्ट प्याकेजको संज्ञा दिए। उनले सिनेमाटोग्राफीमा नरेन्द्र मैनालीको जादु देखिएको र कथावस्तु बिल्कुलै नौलो रहेको बताए। 'कलाकारहरूको अभिनयले दर्शकलाई हलभित्र बाँधेर राख्छ', उनले भने।
त्यसैगरी निर्माता अविरल थापाले फिल्म पारखीहरूका लागि नरेन्द्र मैनालीको छायांकनको जादू अनुभूत गर्न यो सिनेमा हेर्नैपर्ने बताए।
प्रिमियरमा अभिनेता खगेन्द्र लामिछाने, अभिनेत्री नीति शाह लगायतका सेलेब्रिटीहरूले पनि फिल्मको प्राविधिक पक्ष र कथावाचनको शैलीलाई तारिफ गरेका थिए।
फिल्मकी मुख्य कलाकार तथा कार्यकारी निर्माता बेनिशा हमालले प्रिमियरपछि खुसी व्यक्त गर्दै भनिन्, 'नेपालमा साइकोलोजिकल थ्रिलर बनाउनु एउटा ठूलो चुनौती र जोखिम थियो। तर प्रिमियरमा पाएको प्रतिक्रियाले हाम्रो मेहेनत सफल भएको महसुस गराएको छ। यो फिल्म मेरो लागि केवल अभिनय मात्र होइन, एउटा सपना पनि हो।'
निर्देशक बलिराम चौहानले आफूले भन्न खोजेको कथालाई कलाकारहरूले पर्दामा जीवन्त उतारिदिएकोमा आभार व्यक्त गरे।
उनले भने, 'हामीले इमान्दार प्रयास गरेका छौं। प्रिमियरमा पाएको तारिफ जस्तै माया आम दर्शकले पनि हलमा दिनुहुनेछ भन्ने आशा छ।'
'द ब्लु लाइट' मा बेनिशा हमाल, सृष्टि श्रेष्ठ, अर्पण थापा, आयुष्मान देशराज जोशी, महेश त्रिपाठी, सुरक्षा इटानीलगायत मुख्य भूमिकामा छन्। बाल कलाकारमा ग्रिस्मा कटुवाल र सहारा शर्मा छन्।
फिल्म शुक्रबारदेखि देशभरका हलमा प्रदर्शनमा आएको छ।
-1746009348.jpg)
