माछापुच्छ्रे गाउँपालिकाको पर्यटकीय गाउँ ल्वाङ शनिबार चलचित्र बहसको केन्द्र बन्यो।
चलचित्र पत्रकार संघ नेपाल कास्कीको आयोजनामा सम्पन्न 'सिनेमा संवाद' कार्यक्रममा नेपाली सिनेमाका विविध आयाम, चुनौती र सम्भावनाबारे चलचित्रकर्मी, पत्रकार र स्थानीयबीच छलफल भयो।
सिनेमा संवादको चौथो संस्करणको दोस्रो दिन शनिबार गण्डकी प्रदेशका प्रेस रजिष्ट्रार विमला भण्डारीले 'क्ल्याप' गरी उद्घाटन गरेकी थिइन्।
उनले सिनेमा समाजको ऐना मात्र नभई विचारको संवाहक र आर्थिक समृद्धिको महत्वपूर्ण इन्जिन भएको उल्लेख गरिन्। भण्डारीले डिजिटल युगमा फैलिँदै गएका भ्रमपूर्ण तथा मिथ्या सूचनालाई चिर्न चलचित्रकर्मीले जिम्मेवार भूमिका खेल्नुपर्ने आवश्यकता औंल्याउँदै कलाकारहरू केवल विज्ञापनका पात्र नभई समाजका रोल मोडल बन्नुपर्नेमा जोड दिइन्।
माछापुच्छ्रे गाउँपालिकाकी उपाध्यक्ष सीता अधिकारी र वडा नं. ८ का वडाध्यक्ष राम गुरूङले यस्ता कार्यक्रमले ग्रामीण पर्यटन प्रवद्र्धनमा महत्वपूर्ण योगदान पुर्याउने धारणा व्यक्त गरे। पहिलो दिनको साँझ ल्वाङ होमस्टेमा 'सिनेमा साँझ' समेत आयोजना गरिएको थियो, जहाँ कलाकार र स्थानीयबीच सांगीतिक तथा भावनात्मक अन्तरक्रिया भएको थियो।
उद्घाटन सत्रपछि चलचित्रका प्राविधिक, व्यावसायिक र सिर्जनात्मक पक्षमा केन्द्रित चारवटा छुट्टाछुट्टै सत्रमा संवाद सञ्चालन गरिएको थियो।
पहिलो सत्रमा ‘ग्लोबल मार्केटमा नेपाली सिनेमा’ विषयमा लेखक तथा निर्देशक सामिप्यराज तिमिल्सिनाले नेपाली सिनेमा बर्लिन र कान्सजस्ता अन्तर्राष्ट्रिय महोत्सवमा पुगिसकेको उल्लेख गर्दै अब बजार विस्तारमा ध्यान दिनुपर्ने बताए। उनले 'उनको स्वीटर' ले विदेशबाट ६ करोड र 'जेरी एण्ड टप' ले साढे ३ करोडको व्यापार गरेको तथ्य प्रस्तुत गर्दै नेपाली फिल्मको बजार विश्वव्यापी बन्दै गएको दाबी गरे। अभिनेत्री बेनिशा हमालले बलियो कथा भए बजेटले सिर्जनात्मकतालाई रोक्न नसक्ने अनुभव सुनाइन्।
दोस्रो सत्र 'नयाँ पुस्ता र नेपाली सिनेमा' विषयमा केन्द्रित रह्यो। अभिनेत्री आँचल शर्माले पुराना पुस्ताको मेहनत र अनुशासनलाई आत्मसात गर्दै नयाँ पुस्ताले सिर्जनात्मक र फरक विषयवस्तु प्रस्तुत गर्नुपर्ने बताइन्।
अभिनेता सलोन बस्नेतले चलचित्र निर्माण प्रणालीका कमजोरी सुधार्नुपर्ने आवश्यकता औंल्याए भने अभिनेत्री सनिशा भट्टराईले महिला सशक्तीकरण केन्द्रित चलचित्र निर्माण अझ बढ्नुपर्नेमा जोड दिइन्।
तेस्रो सत्र 'सिनेमामा द्वन्द्व' विषयमा केन्द्रित रह्यो। अभिनेता निखिल उप्रेतीले द्वन्द्वलाई केवल कुटाकुट नभई परिस्थितिको स्पष्टता र कथात्मक शक्ति भएको बताए। उनले विश्व बजारमा द्वन्द्वप्रधान चलचित्रको प्रभाव उल्लेख गर्दै नेपाली सिनेमा स्वदेशमै बलियो बन्नुपर्ने धारणा राखे।
निर्देशक मनोज पण्डितले ९० प्रतिशत चलचित्रले निर्मातालाई निराश बनाइरहेको यथार्थ प्रस्तुत गर्दै दर्शकलाई अनुभूति गराउने गुणस्तरीय सिनेमा निर्माण आवश्यक रहेको बताए। उनले विदेशी चलचित्रले नेपालबाट वार्षिक २५ देखि ३० करोड रूपैयाँ बाहिर लैजाने गरेको तथ्यसमेत प्रस्तुत गरे।
अन्तिम सत्रमा 'कन्टेन्ट क्रिएटर भर्सेस नेपाली सिनेमा' विषयमा संवाद भएको थियो। कन्टेन्ट क्रिएटर इस्टु कार्की र महेश भण्डारीले सामाजिक सञ्जाल र सिनेमा एकअर्काका परिपूरक भएको धारणा राखे। कार्कीले आफू पैसाभन्दा पनि समाजमा प्रभाव पार्ने भूमिकामा रुचि राख्ने बताइन् भने भण्डारीले कलाकारितामा रूचिसँगै आर्थिक पक्ष पनि महत्वपूर्ण हुने यथार्थ स्वीकार्नुपर्ने बताए।
कार्यक्रममा चलचित्र पत्रकार संघ नेपाल कास्कीका अध्यक्ष सन्तोष बस्यालले सिनेमा संवादले चलचित्रकर्मी र पत्रकारबीचको सम्बन्धलाई अझ सुदृढ बनाउने विश्वास व्यक्त गरे। उनले छलफलमा उठेका विषयले नेपाली चलचित्रको दायरा विस्तार गर्न महत्वपूर्ण योगदान पुर्याउने बताए।
घान्द्रुक, सिक्लेस र घलेगाउँपछि ल्वाङमा सम्पन्न यो चौथो शृंखलाले नेपाली सिनेमाको विकासका लागि नयाँ बहसको सुरूवात गरेको संस्थापक अध्यक्ष श्रीराम सिग्देल र पूर्व अध्यक्ष अरूण गिरीले बताए।
नेपाल पत्रकार महासंघ कास्कीका अध्यक्ष माधवप्रसाद बराल लगायतले सिनेमा संवाद पछिल्लो समय एक ब्रान्डका रूपमा विकास भइरहेको उल्लेख गरे।
कार्यक्रमले ग्रामीण भेगमै चलचित्र बहस र सांस्कृतिक अन्तरक्रियाको नयाँ अभ्यास स्थापित गरेको सहभागीहरूको भनाइ छ।
