भविष्य फिल्मस् प्राली र थर्ड आइ आर्टस्को ब्यानरमा फिल्म 'टिकाः स्टेटलेस सोल' निर्माण हुने भएको छ।
बिहीबार पाटनस्थित बगलामुखी मन्दिरमा फिल्मको शुभमुहूर्त गरिएको हो। आयोजित विशेष कार्यक्रममा निर्माण टिम, कलाकार तथा प्राविधिकहरूको उपस्थितिमा क्यामेरा, क्ल्याप र स्क्रिप्ट पूजा गरिएको थियो।
तीजको अवसर पारेर आगामी भदौ २६ गते प्रदर्शन मिति घोषणा गरिसकिएको फिल्म आगामी सातादेखि फ्लोरमा जाने तयारीमा छ।
कार्यक्रममा बोल्दै निर्माता भविष्य खड्काले सामाजिक रूपमा विभिन्न विभेद खेप्न बाध्य महिलाको गम्भीर कथामा फिल्म बन्न लागेको बताइन्। पछिल्लो ब्लकबस्टर फिल्म 'जेरी अन टप' की निर्माता समेत रहेकी खड्काले उक्त फिल्मबाट प्राप्त अनुभव, भोगाइ र सिकाइले 'टिका' निर्माणमा जुटेको बताइन्। खड्का दशैं रिलिज तोकिएको फिल्म 'बाटुलो जुन' की समेत निर्माता हुन्।
शंकर कार्कीको निर्देशनमा बन्न लागेको 'टिका'लाई निर्माण टिमले महिला प्रधान फिल्म भनेको छ। फिल्ममा प्रियंका कार्की, वर्षा सिवाकोटी, महेश त्रिपाठी, निर्मल शर्मा, पार्वती अधिकारी र आयुषी ढकाल प्रमुख अभिनयमा रहनेछन्। कार्यकारी निर्माता तेजविक्रम केसी हुन्।
पारिवारिक समस्याका कारण निर्देशक शंकर कार्की भने मुहूर्त कार्यक्रममा उपस्थित भएनन्। फिल्मको कथा शंकर कार्की र चन्दन झाले तयार गरेका हुन् भने पटकथा विश्वास तिम्सिना (बिटी कान्छा) ले लेखेका छन्। फिल्ममा कालिप्रसाद बाँस्कोटा र केतन क्षेत्रीको संगीत रहनेछ भने नरेन्द्र मैनालीले छायांकन गर्नेछन्।
कार्यक्रममा कलाकारहरूले फिल्मको विषयवस्तु, टिमको ऊर्जा र आफ्नो भूमिकाबारे धारणा राखेका थिए। अभिनेत्रीद्वय प्रियंका कार्की र वर्षा सिवाकोटीले यो फिल्म आफूहरूको करियरकै एक विशेष फिल्म हुने बताए।
'मेरो जीवनको लागि यो फिल्म, यो यात्रा र मेरो पात्र सबै विशेष छन्। जुन विषयवस्तुमा कथा तयार गरेर यो फिल्म निर्माण हुँदैछ, सायद त्यस्तो कथा नेपाली फिल्ममा आजसम्म प्रस्तुत गरिएको छैन,' प्रियंकाले भनिन्।
अभिनेत्री सिवाकोटीले निर्मात्री खड्का, सहकर्मीद्वय प्रियंका र महेश त्रिपाठीसँगको सहकार्य सौहार्द र उपलब्धिमूलक हुने विश्वास व्यक्त गरिन्।
