सोमबार चलचित्र विकास बोर्डले आइतबार (असार ७) सम्मको बक्स अफिस विवरण सार्वजनिक गरेको छ।
अघिल्लो सोमबार बोर्डले बक्स अफिस विवरण सार्वजनिक गर्दा ६ वटा फिल्म समावेश थिए भने यसपटक ३ वटामा सीमित भएका छन्। यसले बाँकी तीन फिल्म हलबाट उत्रिएको बुझ्न सकिन्छ।
जेठ ३१ गतेसम्मको विवरणअनुसार 'लालीबजार', 'रोल नं. १', 'मितज्यू', 'काजी', 'लाइफ ड्यामेज' र 'कुम्भ' को कमाइ सार्वजनिक गरिएको थियो। तर असार ७ गतेको पछिल्लो अपडेटमा आइपुग्दा यीमध्ये 'मितज्यू', 'काजी' र 'लाइफ ड्यामेज' सूचीमा छैनन्। जसले ती फिल्महरू हलबाट उत्रिसकेको बुझिन्छ।
'मितज्यू', 'काजी' र 'लाइफ ड्यामेज' उत्रिए, लाइफटाइम कलेक्सन कति?
पछिल्लो बक्स अफिस सूचीमा यी फिल्म समावेश नभएपछि ती हलबाट उत्रिएको मान्न सकिन्छ। त्यसैले अघिल्लो साताकै विवरणलाई नै लाइफटाइम कलेक्सन मानिएको छ।
विवरणअनुसार 'मितज्यू' ले १ करोड ३२ लाख ५३ हजार ३४२ रूपैयाँ कमाउँदै हलबाट उत्रिएको छ। त्यस्तै, 'काजी' ले ४४ लाख ४८ हजार ६० रूपैयाँ कमाएको छ भने 'लाइफ ड्यामेज' को लाइफटाइम कमाइ ३४ लाख ६६ हजार २९० रूपैयाँ रहेको छ। यीमध्ये 'मितज्यू' र 'काजी' जेठ ८ गते रिलिज भएका थिए भने 'लाइफ ड्यामेज' जेठ १ देखि प्रदर्शनमा आएको थियो।
साप्ताहिक कमाइमा 'रोल नं. १' ले 'लालीबजार'लाई उछिन्यो, 'कुम्भ' को कति पुग्यो?
फिल्म 'लालीबजार' लामो समयदेखि हलमा प्रदर्शनरत छ। वैशाख २५ गते रिलिज भएको यो फिल्मले हालसम्म पनि निरन्तर कमाइ गरिरहेको छ। यद्यपि साप्ताहिक कमाइमा भने लगातार गिरावट देखिएको छ।
अघिल्लो आइतबारसम्म ९ करोड १६ लाख ६५५ रूपैयाँ कमाएको फिल्मको कमाइ असार ७ गतेसम्म बढेर ९ करोड २८ लाख १४ हजार ५०५ रूपैयाँ पुगेको छ। अर्थात्, एक सातामा फिल्मले थप १२ लाख रूपैयाँ कमाएको छ। यसअघि भने सातामा झन्डै ३८ लाख रूपैयाँ कमाएको थियो।
त्यस्तै, जेठ १५ गते रिलिज भएको 'रोल नं. १' को कमाइ असार ७ गतेसम्म १ करोड ५५ लाख ४६ हजार ६६८ रूपैयाँ पुगेको छ। यसअघि अघिल्लो सातासम्म यसको कमाइ १ करोड ३५ लाख १५ हजार ९९३ रूपैयाँ थियो, जसअनुसार पछिल्लो साता फिल्मले कमाइमा करिब २० लाख रूपैयाँ थपेको देखिन्छ।
यी दुवै फिल्मको ग्रस कमाइ अघिल्लो साताको तुलनामा पछिल्लो साता घट्दो क्रममा देखिन्छ। जसले बक्स अफिसको गति विस्तारै गिरावट आउँदै गएको देखिन्छ।
जेठ १५ गते रिलिज भएको अर्को फिल्म 'कुम्भ'को कमाइ भने तुलनात्मक रूपमा निकै कम देखिएको छ। यसले हालसम्म ४ लाख २५ हजार ८८५ रूपैयाँ ग्रस कमाएको छ।
गत शुक्रबार रिलिज 'आईएम जितबहादुर' को प्रदर्शन पनि कमजोर देखिएको छ। यसले पाएको शो र दर्शक अकुपेन्सीका आधारमा कमाइ सुखद् नरहेको देखिन्छ।
यद्यपि, यसको आधिकारिक बक्स अफिस रिपोर्ट आगामी सोमबार मात्रै सार्वजनिक हुनेछ।
