गायक स्वप्न सुमनको पछिल्लो गीत ‘राधा’ छोटो समयमै युट्युबमा करोड क्लबमा प्रवेश गरेको छ।
यो गीतलाई युट्युबमा रिलिजको एक महिनामै एक करोडभन्दा बढीपटक हेरिएको हो।
'बिजुली बलेको होला, मै जाने पुतली रेलैमा'
यो गीतका शब्द टंक (राधा कुमारी) पौडेल, ज्योत्सना योगी र स्वप्न सुमनको हो। संगीत स्वप्नकै छ भने स्वरमा उनलाई अभिज्ञा घिमिरेले साथ दिएकी छन्।
यो गीत टिकटकलगायतका सामाजिक सञ्जालमा समेत निकै चर्चामा छ। हरेकजसो पंक्तिहरू स्रोता/दर्शकले रूचाएका छन्।
सोमबार दिउँसोसम्म गीतले युट्युबमा १ करोड ८ लाख बढी भ्युज पाएको छ।
गीतको भिडिओमा मनोज महर्जन र आँचल ताम्राकारको अभिनय छ। ज्योत्सना योगीको कथा तथा निर्देशनमा तयार भिडिओमा बिकेस मगरको छायांकन, अशोक अधिकारीको सम्पादन छ।
स्वप्न सुमनले आफ्नी ८२ वर्षीया हजुरआमाबाट सुन्दै आएका पंक्तिहरूबाट प्रेरित भई यो गीत तयार पारेको बताएका छन्।
यसबारे उनले युट्युबमै उल्लेख गरेका छन्, 'बिजुली बलेको होला, मै जाने पुतली रेलैमा’ यी दुई पंक्तिहरू मैले मेरी ८२ वर्षीया हजुरआमा टंक (राधा कुमारी) पौडेलबाट सुन्दै आएको हुँ। वि.स. २०१५-१६ सालमा गोरखा, नेपालमा उहाँले यिनै पंक्तिहरू गाउनु हुन्थ्यो। यी पंक्तिहरू परम्परागत लोकगीतको अंश भएको विश्वास गरिन्छ, जुन उहाँ र उहाँका साथीहरूले रत्यौली, पूजापाठ, बिहे तथा अन्य सामुदायिक जमघटहरूमा गाउने गर्नुहुन्थ्यो। यसैबाट प्रेरित भई मैले यि पंक्तिहरू लिएर एउटा मौलिक धुन तयार पारेको छु। 'बिजुली बलेको होला, मै जाने पुतली रेलैमा' भन्ने यी दुई पंक्तिहरू, म कुनैपनि प्रतिलिपि अधिकार वा स्वामित्वको दाबी गर्दिनँ, र म यिनलाई परम्परागत सांस्कृतिक अभिव्यक्तिको रूपमा स्वीकार गर्दछु। आफ्ना जरा बचाइराख्ने यो मेरो सानो प्रयास हो। अनि, म चाहन्छु कि यो अभिव्यक्ति भावी पुस्तामा पनि जीवित रहोस्।’
