स्टेजदेखि स्टुडिओसम्म व्यस्त गायिका हुन् शान्तिश्री परियार।
'बोलमाया, गलबन्दी' जस्ता गीत चलेपछि शान्तिश्रीले पछाडि फर्किएर हेर्नुपरेन।
एक कुराकानीमा उनले 'बोल माया' चलेपछि आफूले दिनमा ६ वटासम्म गीत गाएको बताएकी थिइन्। केही महिना अघिमात्रै उनका दुई गीत 'रूकुम मैकोट' र 'अरेली काँडैले' एकसाथ १० करोड क्लबमा प्रवेश गरे।
अहिले शान्तिश्रीको व्यस्तता अझ बढेको छ। उनले लोकदोहोरीमात्र नभएर फिल्मका गीतमा समेत धमाधम काम गरिरहेकी छन्।
उनको सामाजिक सञ्जाल हेर्दा पनि त्यो प्रष्ट हुन्छ। हिजोआज उनले दिनमा ४ वटासम्म गीत रेकर्ड गराइरहेकी छन्।
तीज रेकर्डिङको चहलपहल सुरू भएपछि उनको व्यस्तता थप बढेको छ।
शान्तिश्रीले गत मंगलबार ३ वटा गीत गाइन्। सोमबार एकैदिन ४ वटा रेकर्डिङ गरेको जानकारी दिइन्। त्यसअघि आइतबार ३ वटा गीत गाइन् भने शुक्रबार २ वटा गीत रेकर्ड गराएको सामाजिक सञ्जालमार्फत जानकारी दिएकी छन्।
गायनबाट स्रोता/दर्शकमाझ छाएकी शान्तिश्रीले केही महिना अघिमात्रै काठमाडौंमा घर खरिद् गरेकी थिइन्।
