'सरर सरर...', 'तिमीलाई सम्झेर', 'टुटेको मुटु', 'बैगुनी' सहितका चर्चित गीतका सर्जक तथा गायक केहर सिंह लिम्बुले फिल्ममा डेब्यु गर्ने भएका छन्।
उनी र उनको ब्याण्ड 'केहर एण्ड द लुंगा' ले फिल्म 'कुमारी' बाट पार्श्व गायनमा पहिलो पाइला चालेको हो।
प्रेमकथामा बन्न लागेको फिल्म 'कुमारी' लाई दिनेश राउतले निर्देशन गर्दैछन्। यो फिल्मको शुक्रबार काठमाडौंको टुँडिखेलमा भव्य सांगीतिक कार्यक्रमको माहौलकाबीच औपचारिक निर्माण घोषणा गरिएको थियो। जहाँ 'केहर एण्ड द लुंगा' ब्यान्डले 'सरर सरर...' सहित फिल्मका लागि तयार पारेको गीत 'कहाँ छौ' प्रस्तुत गरे।
प्रस्तुतिका क्रममा केहरले फिल्ममा पनि स्रोता तथा दर्शकहरूबाट मायाको अपेक्षा रहेको बताए। केहर खासगरी जेन जी पुस्तामाझ चर्चित छन्।
'कुमारी' फिल्मका कलाकारहरूको कुरा गर्दा यसमा अभिषेक खड्का र आकृति राजभण्डारीले शीर्ष भूमिकामा अभिनय गर्दैछन्। फिल्मको छायांकन यसै सातादेखि सुरू हुँदैछ।
-1746009348.jpg)
