लन्डनको वेम्बली एरिनामा १० हजार दर्शकमाझ प्रस्तुति दिएर सुरू भएको नेपथ्यको यस वर्षको शृङ्खलाबद्ध युरोप यात्रा लगातार भव्य सफलताका साथ टुंगिएको छ।
नेपथ्यले युरोप यात्राको अन्तिम प्रस्तुति बुधबार बेल्जियममा गरेको थियो। बेल्जियममा स्थानीय एईडी स्टुडियोस्थित हलभरि दर्शकको उपस्थितिमाझ साँझ ठीक ८ बजे नेपथ्यको कन्सर्ट सुरू भएको थियो।
दुईवटा म्युजिक भिडिओ सकिनासाथ दर्शकको चर्को आवाजबीच नेपथ्य टोली मञ्चमा देखा पर्यो। लगत्तै गायक अमृत गुरूङ मञ्चमा उपस्थित हुँदा हलभरि विभिन्न ‘स्पेशल इफेक्ट’ का प्रभाव– ध्वनि, प्रकाश, सीओटूको मुस्लो र कनफेटिका टुक्राहरू फैलिन थाले। यसैबीच नेपथ्यको पहिलो गीत 'कोशीको पानी यो जिन्दगानी' सुरू भयो।
गीतमा रहेको 'आमाको कोखमा बास मात्र लिएँ, कुन देशको मरन हौ हजुर' गाइरहँदा दर्शकदीर्घामा कतिपय अनुहार भावुक देखिन्थे।
'माल्टामै आयोजित अघिल्लो कार्यक्रममा केही गीत मात्र सुन्न पाएको थिएँ,' बेल्जियमको कन्सर्ट हेर्न माल्टादेखि आइपुगेका रेस्टुरेन्ट व्यवसायी उदयबाबु श्रेष्ठ भन्दै थिए, 'नेपथ्य युरोपमै रहेको बेला पूरै कन्सर्ट हेरेरै छाड्ने अठोटका साथ म त्यति परदेखि आएँ।'
कन्सर्ट अवधिभर नाच्दै रमाइरहेका उदयबाबु केवल यति हेर्नका लागि बेल्जियम आएका थिए र बिहीबार बिहानैको पहिलो विमानबाट माल्टा फर्केका थिए।
'नेपथ्यले मलाई जीवनकै एउटा यादगार साँझ दिएको छ,' उनले थपे, 'त्यसका लागि म ब्यान्डलाई धन्यवाद नदिइरहन सक्दिनँ।'
कन्सर्टमा त्यसपछि 'भेँडाको ऊन', 'छेक्यो छेक्यो', 'आँगनैभरि' र 'लामपाते सुरती' जस्ता नेपथ्यका सर्वकालीन हिट गीतहरू सुनाइएका थिए।
'यस सहरमा नेपाली समुदायको चहलपहल लामो समयदेखि भए पनि यति धेरै दर्शकचाहिँ आज पहिलोपटक देखिएका हुन्,' आयोजक टोलीका अजित तुलाचन भन्दै थिए, 'यसअघि ठूला आयोजनामा पनि बढीमा छ–सात सय दर्शक मात्र सहभागी हुन्थे।'
अजितका अनुसार दर्शकको उपस्थिति मात्र नभई स्तरीयताका हिसाबले पनि बेल्जियमको माटोमा यस कन्सर्टले नेपाली कार्यक्रमका लागि कोसेढुंगा स्थापित गरिदिएको छ।
'अन्तर्राष्ट्रिय स्तरको शो प्रस्तुत गर्न सक्ने व्यावसायिक समूहसँग आयोजक भई काम गर्दाको अनुभव नै बेग्लै हुन्छ,' उनले थपे, 'यस सहकार्यबाट मलाई धेरै ज्ञान बटुल्ने अवसर पनि प्राप्त भएको छ।'
कन्सर्टमा माया–प्रीतिका गीतहरूदेखि लिएर 'यो जिन्दगानी' जस्तो सामाजिक भावना, 'गाउँगाउँबाट उठ' जस्ता जागरणका गीतहरू हुँदै 'रातो र चन्द्रसुर्जे' जस्तो राष्ट्रियता झकझक्याउने गीतहरू प्रस्तुत भएका थिए। सधैँझैँ यिनै गीतका भावसँग मिल्ने सामाजिक सन्देशहरू पनि बीच–बीचमा गायक अमृतले प्रवाह गरे। विदेशमा रहँदा उनले सबैलाई मिलेर बस्न आह्वान गरे।
'तपाईंहरू बसेको मुलुकको संस्कृति र यहाँका मानिसलाई सम्मान गर्न नछाड्नुहोला,' उनी भन्दै थिए, 'तपाईंले उनीहरूलाई सम्मान गर्नुभयो भने तपाईंको मान पनि उनीहरूले राख्नेछन्।'
युरोपका मुलुकहरू घुम्दै गर्दा धेरैले अमृतलाई अवसरको खोजीमा आफूहरू यतातिर आएको बताएका रहेछन्।
'तपाईंको समयलाई आर्थिक लाभका साथसाथै ज्ञान र अनुभव आर्जन गर्नमा पनि सदुपयोग गर्नुस्,' उनले आह्वान गरे, 'एक दिन तपाईंहरू आफ्नै हिमालको काखमा आएर देशको उन्नतिमा लाग्नुपर्छ।'
विगतमा बर्मा, मेघालय र भुटानजस्ता देशहरूबाट फर्काइएका नेपालीको भोगाइलाई सम्झेर भए पनि स्वदेशसँगको आफ्नो नातासम्बन्ध जोगाइरहन अमृतले सुझाव पनि दिए।
'कथम्कदाचित् केही भइहाले तपाईंहरू आउने त्यही हिमालको काख नै हो,' उनले भने।
कन्सर्टमा बेल्जियमबाहेक वरपरका युरोपेली मुलुकहरू, खास गरी नेदरल्यान्ड्स, लक्जेम्बर्ग, फ्रान्स, जर्मनी, अस्ट्रिया लगायतबाट आएका दर्शक पनि उत्तिकै देखिन्थे।
२० वर्षपहिले पनि आम्स्टरडममा नेपथ्य कार्यक्रम आयोजना गरेका हिमालय फिल्म फेस्टिवलका डा. ग्लेन मित्रसिङ यसपालि कन्सर्ट हेर्नकै लागि नेदरल्यान्ड्सदेखि तीन घण्टा मोटर हाँकेर आएका थिए।
'यस अवधिमा ब्यान्ड झनै बढी परिपक्व भएको, आफ्नो जरालाई अझ बलियोसँग समातेको र उपल्लो स्तरको व्यावसायिक प्रस्तुतिमा पोख्त बनेको पाएँ,' उनले भने।
कन्सर्टको अन्त्यतिर अमृतले दर्शकसँग 'अब कुन गीत सुन्ने?' भनेर प्रश्न गरेका थिए। त्यसमा अधिकांश दर्शकले 'रेशम' भनेर चिच्याए।
'रेशम' पछि 'तालको पानी' हुँदै 'रातो र चन्द्रसुर्जे' गीतमा पुगेपछि कार्यक्रम अन्त्य भएको थियो।
कन्सर्टमा अमृतलाई ड्रमसेटमा ध्रुव लामा, बेस गितारमा सुबिन शाक्य, गितारमा नीरज गुरूङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए।
लन्डनको वेम्बली एरिनाबाट एक महिनाअघि सुरू भएको नेपथ्यको शृङ्खलाबद्ध युरोप यात्राका क्रममा नेपथ्यले डेनमार्क, माल्टा र पोर्चुगलमा पनि आफूलाई प्रस्तुत गरेको थियो।
सबैतिरजस्तै बेल्जियममा पनि 'हाउसफुल' दर्शकको माया बटुलेर १४ सदस्यीय कलाकार, प्राविधिक र व्यवस्थापनको टोली स्वदेश फर्केको छ।
तस्बिरहरूः दिपित राज/नेपालय
-1746009348.jpg)
