लोक–रक ब्याण्ड नेपथ्यले यो वर्षको नेपाल यात्रालाई हेटौंडाबाट भव्यतापूर्वक सुरू गरेको छ। यात्राको पहिलो प्रस्तुति बुधबार बेलुकी यहाँस्थित भुटनदेवी विद्यालयको मैदानमा सम्पन्न भएको हो।
कन्सर्टमा हजारौंको संख्यामा उपस्थित दर्शक–श्रोताले उत्साहका साथ नाचेर सहभागिता जनाएका थिए। केही समययता ब्याण्डले नियमित प्रस्तुत गर्दै आएको गीतक्रममा परिवर्तन गर्दै 'हो रामा रामा' बाट कन्सर्टको सुरूआत गरेको थियो। अघिल्ला प्रस्तुतिहरूमा मध्यक्रममा रहने गरेको यो गीतले सुरूदेखि नै मैदानलाई ऊर्जाशील बनाएको देखिन्थ्यो। त्यसपछि ‘भेँडाको ऊन’ र ‘छेक्यो छेक्यो’ हुँदै कन्सर्ट अघि बढेको थियो।
कार्यक्रमस्थलमा अग्रपंक्तिमा उपस्थित दर्शकमध्ये रहेकी मान्यता सापकोटाले यस्तो सांगीतिक कार्यक्रमले सहरै रमाइलो पार्ने बताइरहेकी थिइन्। 'चार वर्षअघि हेटौंडामा नेपथ्य उपस्थित हुँदा म बुवाको साथ आएकी थिएँ', स्थानीय कृष्णमन्दिर छेवैमा घर भएकी स्नातक प्रथम वर्षकी विद्यार्थी मान्यताले भनिन्, 'त्यतिबेला ढिलो आएकोले धेरै गीत छुटेकै कारण यसपाला समयमै मैदानमा प्रवेश गरेँ र अगाडिकै लहरमा ठाउँ पाएँ।'
साथी श्रीना ढुंगेल र बहिनीहरुलाई पनि साथमा लिएर आएकी मान्यता कन्सर्टमा सुरूदेखि अन्तिमसम्मै नृत्यरत देखिन्थिन्। यस्तो उत्साह मैदानको अन्तिम घेरासम्म फैलिएको थियो। जहाँ सुरक्षार्थ खटिएका प्रहरीहरू समेत संगीतमा रमाइरहेको दृश्य देखिन्थ्यो। महिला प्रहरी टोलीको कमाण्ड सम्हालिरहेकी जिल्ला प्रहरी कार्यालयकी हवल्दार लालुमाया गुरूङ पनि त्यही लहरमा देखिइन्।
'निकै रमाउनु भएको देखियो त?' भन्ने प्रश्नमा उनी एकछिन अकमकाउँदै मुस्कुराइन् र प्रतिप्रश्न गरिन्, 'हामी पनि त मानिस हौं, यस्तो बेलामा मन रमाउँछ नि!'
यस्ता कार्यक्रमहरुमा सुरक्षार्थ धेरैपटक खटिसकेको बताउने लालुमायाले अमृत गुरूङ आफूलाई सबभन्दा मनपर्ने गायक रहेको जानकारी दिइन्।
'आफू गुरूङ भएकैले भनेको होइन है', उनले अन्यथा अर्थ नलागोस् भन्दै प्रष्ट पारिन्, 'म त धेरै पर सुर्खेतको मान्छे पो हुँ।'
यता कार्यक्रमले ‘लामपाते सुरती’ पछि पनि पुरानै गीतहरु 'चरी म¥यो' र 'जोमसोमे बजारमा' बाट निरन्तरता पाइरहेको थियो। त्यसपछिको क्रममा दर्शकहरुलाई स्वदेश घुम्ने सल्लाह दिँदै अमृतले धौलागिरितिर आफूले यात्रा गर्दा तयार पारेको गीत सुनाए।
'शिरफूल शिरैमा वनफूल वनैमा
हिउँको फूल धौलासिरिमा'
त्यस क्रममा उनले कर्णाली भेगको दुःख र त्यसकैबीच पनि सन्तोष मानेर बाँचिरहेका बासिन्दाको खुशी अनुभव गर्न त्यसतर्फको यात्रा पनि जरूरी रहेको औंल्याउँदै भर्खरै तयार पारेको गीत 'कर्नालीका छाइला' पनि सुनाए।
'यो संसारमा थोरै राम्रा मानिसको मानवीयताले गर्दा धेरै मानिसले बाँच्ने मौका पाइरहेका छन्', अमृतले दर्शकहरुलाई अनुरोध गर्दै भने, 'तपाईंहरुको छेउछाउमा स्कुल जान नपाएका बालबालिका छन् भने उनीहरुलाई शिक्षाको उज्यालोसम्म नजिक्याएर पुण्य कमाउन नछुटाउनुस् है।'
यसै क्रममा ब्याण्डको अर्को सर्वकालिक हिट गीत 'यो जिन्दगानी' गाइएको थियो।
कन्सर्ट अघि बढ्दै जाँदा ‘गाउँ गाउँबाट उठ’ को पालो आइपुग्यो। अमृतले मञ्चबाट यो गीत गाइरहँदा हेटौंडाको भुटनदेवी स्कुल मैदानमा भरिएका अधिकांश दर्शकहरुले पनि गाएरै साथ दिइरहेको रोचक दृश्य देखिन्थ्यो।
त्यो उत्साहलाई समात्दै गीतको बीचैमा गायक अमृतले बोल्न पनि थाले, 'यसपाला चुनावमा कसैको पनि लोभ वा डर नमानेर मुलुकका लागि असल नेतृत्वको चयन गर्नु तपाईं हामी सबैको कर्तव्य हो।'
अमृतले निर्वाचनमा सहभागि हुन गरेको अपीललाई सबैले ताली बजाएर स्वीकारेका थिए। धुनकै क्रममा गायकबाट आएको यो आव्हानले नृत्यरत दर्शकमा अझ उत्साह थपेको थियो ।
कार्यक्रमको अन्त्यतिर 'रेशम' र 'तालको पानी' गाइयो भने अन्तिममा राष्ट्रिय भावनाले भरिएको 'रातो र चन्द्रसूर्जे' बाट कन्सर्ट टुंग्याइएको थियो।
'हेटौंडाले फेरि एकपटक आफूलाई नेपथ्यप्रेमी साबित गरेको छ', आयोजक समूह रमाइलो इभेन्ट्सका शिवम् शर्मा भन्दै थिए, 'कार्यक्रम भव्य मात्र नभई व्यवस्थित तवरले सम्पन्न गर्न पाएकोमा सबैलाई धन्यवाद दिन्छौं।'
कन्सर्टका क्रममा गायक अमृत गुरूङले आफूलाई साथ दिने कलाकारहरूको पनि परिचय गराएका थिए। ड्रमसेटमा ध्रुव लामा, बेस गितारमा सुविन शाक्य, गितारमा निरज गुरुङ, मादलमा शान्ति रायमाझी र किबोर्डमा दिनेशराज रेग्मी रहेका थिए।
हेटौंडाको कन्सर्ट सम्पन्न भएपछि नेपथ्य टोली बुटवल प्रस्थान गरिसकेको छ। यही शनिबार त्यहाँस्थित 'बुटवल अन्तर्राष्ट्रिय सम्मेलन केन्द्र रामनगर' परिसरमा ब्याण्डको प्रस्तुति रहनेछ। त्यसपछिको यात्रा क्रमशः नारायणघाट र बन्दीपुर तर्फको हुनेछ।
दर्शक सुविधालाई ध्यानमा राख्दै सबैजसो कन्सर्टहरूको टिकट अनलाइनमार्फत उपलब्ध गराइएको छ।
तस्बिरहरूः दिपित राज
-1746009348.jpg)
