गायक, संगीतकार, एरेन्जर तथा गिटारिस्ट दीपक थापा हाल गम्भीर स्वास्थ्य समस्यासँग जुधिरहेका छन्।
प्रतिष्ठित ब्यान्ड 'द प्रिज्म' का सदस्यसमेत रहेका थापा क्रोनिक किड्नी डिजिज स्टेज–५ बाट पीडित छन्। सातामा तीनपटक नियमित डायलसिस गराइरहेका उनको स्वास्थ्य सुधारका लागि किड्नी प्रत्यारोपण (ट्रान्सप्लान्ट) आवश्यक भएको चिकित्सकहरूले बताएको पारिवारिक स्रोतले जनाएको छ।
भैरहवामा जन्मिएका थापाले आफ्नो बाल्यकाल हङकङमा बिताउँदै त्यही क्लासिकल गितार अध्ययन गरेका थिए। नेपाली संगीत क्षेत्रमा उनी विशेषगरी 'विदेश जाने मायालु तिमीलाई' गीतका गायक र सर्जकका रूपमा चिनिन्छन्। यो गीत २०४० को दशकतिर निकै लोकप्रिय बनेको थियो। उनले पहिलोपटक पोखरामा आयोजित कार्यक्रममार्फत गीत सुनाएका थिए र श्रोताले अत्यधिक रूचाएपछि गीत पोखरा, भैरहवा, बुटवल र धरानसम्म चर्चित बनेको थियो।
सन् १९९५ मा आफ्नै स्वरमा रेकर्ड गरिएको यो गीत करिब चार दशकपछि नयाँ पुस्तामाझ पु¥याउने उद्देश्यले पुनः रेकर्ड गरी म्युजिक भिडिओ सार्वजनिक गरिएको थियो।
दीपक थापा गायक मात्र नभई नेपाली संगीत क्षेत्रमा कम्पोजर, एरेन्जर र गिटारिस्टका रूपमा पनि परिचित छन्। उनले सिर्जना गरेको पहिलो रेकर्ड भएको गीत 'ऊ मेरो प्रियतम्' , 'त्यसैले मायालु भनेर बोलाऊ कि', 'जलमा थलमा', 'आँखामा तिम्रो सम्झना छ' लगायत तीन दर्जनभन्दा बढी गीतहरू उनले सिर्जना गरेका छन्।
पश्चिमा संगीतको प्रभाव बढ्दै गएको समयमा नेपाली आधुनिक संगीतमा उनले महत्वपूर्ण भूमिका खेलेका थिए।
हाल नियमित डायलसिस र बढ्दो चिकित्सकीय खर्चका कारण उनलाई आर्थिक रूपमा ठूलो चुनौती परेको पारिवारका सदस्यले बताएका छन्।
कलाकार थापाको उपचारका लागि हाल परिवार, साथीभाइ र संगीतप्रेमीहरूले सहयोग अभियान सञ्चालन गरिरहेका छन्। इच्छुकले बैंक खातामार्फत आर्थिक सहयोग गर्न सक्ने जनाइएको छ।
-1746009348.jpg)
