नेपाली सांगीतिक क्षेत्रका चर्चित दुई ब्यान्ड सविन राई एन्ड द फारोह र नविन के. भट्टराई एन्ड अतृप्त एकै मञ्चमा प्रस्तुत हुने भएका छन्।
यही साउन २३ गते (८ अगस्ट) ठमेलस्थित क्लब नोभामा 'द रक लेगेसी' लाइभ कन्सर्ट आयोजना हुने भएको हो।
स्मार्ट जीको प्रस्तुतिमा हुने कन्सर्टमा दुवै ब्यान्डले आफ्ना चर्चित तथा सदाबहार गीतमार्फत दर्शकलाई मनोरञ्जन दिनेछन्। कार्यक्रममा गेस्ट डीजे निशानको विशेष प्रस्तुति पनि रहनेछ।
यसपटक आयोजकले मनोरञ्जनसँगै सामाजिक उत्तरदायित्वलाई पनि जोडेको छ।
क्यान्सरसँग संघर्ष गरिरहेकी रेखा गुप्ताको उपचारमा सहयोग पुर्याउने उद्देश्यले ई-सेवामार्फत बिक्री हुने प्रत्येक टिकटबाट १० प्रतिशत रकम सहयोग गरिने स्मार्ट जीकी रेश्मा श्रेष्ठले जानकारी दिइन्।
उनका अनुसार दर्शकले टिकट खरिदमार्फत उत्कृष्ट सांगीतिक अनुभवसँगै मानवीय अभियानमा पनि साथ दिन सक्नेछन्।
कन्सर्टको व्यवस्थापन आवरण इभेन्ट्सले गरेको छ भने टिकटिङ पार्टनर ई-सेवा रहेको छ। आयोजकका अनुसार सामान्य प्रवेशका लागि टिकट मूल्य १ हजार र भिआइपी प्रवेशका लागि १ हजार ५ सय रूपैयाँ निर्धारण गरिएको छ।
कार्यक्रममा ठूलो संख्यामा संगीतप्रेमीको सहभागिता रहने आयोजकको अपेक्षा छ।
