नेपाली मूलका अस्ट्रेलियन प्रहरी वरिष्ठ कन्स्टेबल विकास भारतीले अस्ट्रेलियाको प्रतिष्ठित राष्ट्रिय बहादुरी पुरस्कार प्राप्त गरेका छन्।
अस्ट्रेलियाको पुलिस फेडेरेसनले भारतीलाई उक्त सम्मान प्रदान गरेको हो।
उनलाई अस्ट्रेलियाका प्रधानमन्त्री एन्थोनी अल्बानिजले अक्टोबर २८ मा क्यानबेरामा आयोजित समारोहमा उक्त पुरस्कार प्रदान गरेका हुन्।
उनी अस्ट्रेलियाको न्यु साउथ वेल्स (एनएसडब्ल्यू) प्रहरीमा कार्यरत छन्।
भारतीले सन् २०२५ अक्टोबर ५ मा ड्युटीका क्रममा देखाएको साहसका लागि उक्त पुरस्कार पाएका हुन्।
त्यस साँझ क्रोइडन पार्कस्थित जर्जेस रिभर रोडमा गोली चलेको खबरपछि प्रहरी परिचालन भएको थियो।
घटनास्थलमा सबैभन्दा पहिले पुग्ने प्रहरी टोलीमा भारती पनि थिए। उनीसँग एक कनिष्ठ प्रहरी अधिकारीसमेत थिए।
घटनास्थल पुगेलगत्तै उनीहरूमाथि गोली प्रहार भएको थियो।
गोली चलिरहेकै अवस्थामा भारतीले सुरुमा आफूसँगै रहेका कनिष्ठ प्रहरी अधिकारीलाई सुरक्षित स्थानमा जान निर्देशन दिए।
त्यसपछि उनले गाडीभित्र फसेका घाइते सर्वसाधारणलाई ज्यान बचाउन आवश्यक सहयोग गर्ने प्रयास गरे।
खतरा कायमै रहे पनि उनले घाइतेलाई सहयोग गर्न जारी राखेका थिए। पछि उनलाई सुरक्षित स्थानमा जान निर्देशन दिइएको थियो।
घटनाका क्रममा भारतीले देखाएको साहस, नेतृत्व क्षमता र मानवीय सेवाभावको कदर गर्दै राष्ट्रिय बहादुरी पुरस्कार प्रदान गरिएको बर्वुड प्रहरी क्षेत्रीय कमान्डले जनाएको छ।
सन् २०१५ मा नेपालबाट अस्ट्रेलिया पुगेका भारतीले पुरस्कार ग्रहणपछि आफ्नो अनुभव सुनाउँदै अस्ट्रेलियामा अवसर, सुरक्षा र परिवारको राम्रो भविष्य खोज्दै आएको बताए।
'एक आप्रवासीका रूपमा म अवसर, सुरक्षा र आफ्नो परिवारको राम्रो भविष्य खोज्दै यहाँ आएको थिएँ। एक दिन न्यु साउथ वेल्स समुदायको प्रहरीका रूपमा सेवा गर्ने अवसर पाउँछु भन्ने कल्पना पनि गरेको थिइनँ,' उनले भने।
उनले घटनाका दिन आफूलाई साथ दिएका सहकर्मीहरूको पनि स्मरण गरेका थिए। प्रहरी सेवा कुनै एक व्यक्तिको प्रयासले मात्र सम्भव नहुने उनको भनाइ थियो।
बर्वुड प्रहरी क्षेत्रीय कमान्डले भारतीको बहादुरीलाई प्रहरी सेवाको साहस, मानवीयता र नेतृत्वको उदाहरणका रूपमा उल्लेख गर्दै उनको सम्मानप्रति खुसी व्यक्त गरेको छ।
