संयुक्त अधिराज्य बेलायतको स्कटल्याण्डमा मिनी नेपालकै झल्को दिने गरी बृहत् नेपाली मेलाको आयोजना गरिएको छ।
नेपाली दूतावास लन्डनद्वारा आयोजना गरिएको मेलामा नेपालकै झल्को दिने गरी नेपाली कला संस्कृति र परम्पराको बृहत् प्रदर्शनी गरिएको थियो।
एनआरएन स्कटल्याण्डसहित विभिन्न स्थानीय नेपाली संघसंस्थाहरूको सहकार्यमा आयोजित कार्यक्रममा झन्डै ३ हजार सहभागी भएको जनाइएको छ।
स्कटल्याण्डको राजधानी एडिनबराकै मुटु मानिने प्रिन्स स्ट्रिटको प्रिन्सेस गार्डेनमा आयोजित कार्यक्रममा नेपाली कला हस्तकलाको सामग्रीको प्रवर्द्धन तथा पन्चे बाजा सहितका झाँकीहरू प्रदर्शन गरिएको थियो।
मौलिक नेपाली खानाहरूको स्टलमा अधिकांश नेपाली सहित विदेशीहरू समेत रमाइरहेका देखिन्थे।
विश्वको सबभन्दा ठूलो कला महोत्सव एडिनबरा फ्रिन्ज आयोजना गर्ने प्रसिद्ध स्कटिस सहरमा हजारौं नेपाली र विदेशी नेपाली कला संस्कृति र संगीतसँगै झुमेका थिए।
दूतावासले २३ जुन सोमबार एनआरएनए स्कटल्याण्डसहित झण्डै दुई दर्जन नेपाली संघसंस्थाको प्रत्यक्ष सहभागितामा मेला गरेको हो।
कार्यक्रमलाई सम्बोधन गर्दै बेलायतका लागि नेपाली राजदूत चन्द्र कुमार घिमिरेले कार्यक्रमको मूल उद्देश्य विदेशमा नेपाललाई चिनाउनुका साथै युवापुस्तालाई नेपाली मौलिक कला संस्कृतिबारे जानकारी एवं नेपाल स्कटल्याण्ड नेटवर्किङ गराउनु रहेको बताए।
प्रमुख अतिथि स्कटल्याण्डकी क्याबिनेट सेक्रेटरी फर सोसल जस्टिस सिर्ले एन्नी समरभिलले आफ्नो सहरमा नेपाली बहुसांस्कृतिक मेला देख्न पाउँदा खुसी लागेको बताइन्।
बिहान १० देखि साँझ ६ बजेसम्म भएको मेलामा रोयल बोटानिकल गार्डेनका वैज्ञानिकदेखि स्थानीय काउन्सिलरहरू, विदेशी पर्यटक, स्कटिस तथा नेपाली नागरिकसहित तीन हजार बढीको सहभागिता थियो।
मेलाका दौरान दूतावासले राहदानी लगायत कन्सुलर विषयसँग सम्बन्धित सेवा पनि उपलब्ध गराएको थियो
सो अवसरमा नेपालबाट आएका एवं स्थानीय कलाकारले बेजोड सांस्कृतिक प्रस्तुति दिएका थिए।
-1746009348.jpg)
