थाइल्याण्डको एक गुफामा थुनिएर रहेका बाँकी आठजना बालक र उनीहरूका एक प्रशिक्षकसहित नौ जनाको उद्धार कार्य सोमबार पनि बिहानैबाट सुरू भएको छ।
दक्षिणी थाइल्याण्डमा रहेको एउटा गुफामा करिब दुई हप्तादेखि फसेका १३ जनामध्ये आइतबार चार जनालाई सकुशल उद्धार गरिएको थियो। उद्धाको कार्य अति कठिन भएकोले हिजो चारजनालाई मात्र बाहिर निकाल्न सकिएको थियो ।
सोमबार पनि उद्धार कार्य स्थानीय समय अनुसार बिहान १० बजे सुरू भएको सरकारी अधिकारीहरूले बताएका छन्। उनीहरूले पानीका कारण यो कार्य हिजोजस्तो सहज नहुने देखिएको पनि बताएका छन्।
उद्धारका लागि अन्तर्राष्ट्रिय गोताखोर, उद्धारको क्षेत्रमा कार्यरत विज्ञहरूलाई परिचालन गरिएको छ। साथै उक्त गुफाको उत्तरतर्फ निर्माण गरिएको ढोकामा दुइटा एम्बुलेन्स राखिएको छ।
उद्धार गरी निकालिने बालकलाई एम्बुलेन्समा राखेर तुरुन्तै अस्पताल पुर्याउने जनाइएको छ। आइतबार उद्धार गरी निकालिएका चार जनालाई पनि अस्पतालमा राखिएको जानकारी दिइएको छ।
उद्धार टोलीमा थाई सेनाको विशेष टोली पनि सहभागी गराइएको छ। उनीहरूलाई बाहिर निकाल्न गुफाको वरिपरिको विभिन्न स्थानमा प्वाल पारेर गुफा भित्रको ग्याँस बाहिर फाल्ने र बाहिरबाट अक्सिजन भित्र पठाउने ‘चिम्नी’ बनाइएको छ।
गुफा बाहिरबाट करिब ३०० मिटर गहिरो प्वाल पारिएको छ। आइतबार यिनै चिम्नीबाट चार जनालाई निकालिएको हो। उद्धार कार्यमा खटिएकाहरूले आज केही र बाँकी भोलिसम्ममा सबैजना निकालिने जानकारी दिएका छन्।
केही दिन लगाएर अक्सिजन भित्र पठाउन सकिनेगरी चिम्नी बनाइएको छ। त्यसैबाट गुफाभित्रको ग्याँस पनि बाहिर आउने भएकोले उद्धारकर्ता सजिलै गुफाभित्र जान र बाहिर आउनसक्ने भएको बताएका छन्।
उनीहरू गएको जुन २३ देखि गुफामा फसेका हुन्। हराएको दिनदेखि खोजी शुरु भए पनि नवौँ दिनमा उनीहरुको अवस्था पत्ता लागेको थियो।
थाइ उद्धार अधिकारीहरुले दिएको जानकारीअनुसार उद्धार कार्यमा करिब एक हजार जना व्यक्ति परिचालन गरिएको छ।
यसमा प्राकृतिक प्रकोपका समयमा मानिसलाई उद्धार गर्न सक्ने विशेष क्षमता भएका विशेषज्ञ टोली र चिकित्सकहरू पनि छन्।
रासस/एएफपी
