बैंकहरू अहिले पर्याप्त रकम फिर्ता दिन सक्ने अवस्थामा रहेको राष्ट्र बैंकका कार्यकारी निर्देशक देव कुमार ढकालले बताएका छन्।
राष्ट्र बैंकको आयोजनामा चलिरहेको 'ग्लोबल मनी विक' को १२औं संस्करणको क्रममा सोमबार आयोजित कार्यक्रममा उनले यस्तो बताएका हुन्।
आयोजित कार्यक्रममा विद्यार्थीहरूले पछिल्लो समय बैंकहरूबारे आएका खबर सम्बन्धमा राखेको प्रश्नमा उनले यस्तो बताएका हुन्।
'बैंकहरू डुब्नु भनेको बैंकहरूले पैसा फिर्ता दिन नसक्नु या त बैंकहरूको धेरै कर्जा खराब भएर समस्यामा पर्नु भन्ने हो,' ढकालले भने, 'तर, यो दुवै अवस्थामा बैंकहरू राम्रो अवस्थामा छन्।'
बैंकहरूमा २० प्रतिशत तरलता (कर्जा लगानी बाहेक रहनु पर्ने रकम) रहनु पर्ने भए पनि हाल २७ प्रतिशतसम्म रहेको उनले स्पष्ट पारे।
त्यस्तै, अहिले बैंकहरूको खराब कर्जा दक्षिण एशियाकै कम रहेको समेत उनले बताए। हाल बैंकहरूको खराब कर्जा ३.३६ प्रतिशत छ।
राष्ट्र बैंकले दैनिक, मासिक, त्रैमासिक रूपमै बैंकहरूको तथ्यांक हेरिरहेकोले बैंकसम्बन्धी विभिन्न हल्लाबाट भ्रममा नपर्न समेत उनले सबैलाई आग्रह गरे।
नेपाल बैंकर संघ र एनएमबी बैंकको प्रमुख कार्यकारी अधिकृत सुनिल केसीले बैंकहरू ४० वर्ष यताकै सुविधाजनक अवस्थामा रहेको बताए।
उनले अहिले बैंकहरूमा १०/१५ वर्ष यताकै उच्च तरलता रहेको र बैंकहरूले कर्जा लगानी गर्न सक्ने रकम नै ५ खर्ब रूपैयाँभन्दा धेरै रहेको समेत जानकारी दिए। उनले मुलुकको विदेशी मुद्रा सञ्चिति हालसम्मकै उच्च हुँदा समेत बैंकहरूलाई सहज रहेको बताए।
राष्ट्र बैंकको आयोजनामा 'आफ्नो पैसाको सुरक्षा गरौं, भविष्य सुरक्षित बनाऔं' भन्ने नारा सहित साताव्यापी रूपमा 'ग्लोबल मनी विक' मनाइने भएको छ।