आइतबारबाट श्रीनगर एग्रिटेक इन्डष्ट्रिजको आइपिओ खुलेको छ।
सर्वसाधारणको लागि कम्पनीले २५ लाख १० हजार चार सय ९३ कित्ता सेयर जारी गरिरहेको हो। कम्पनीले वैदेशिक रोजगारीमा रहेका र स्थानीयको लागि सेयर जारी गरिसकेको छ।
कम्पनीले कुल ३२ लाख ६२ हजार कित्ता सेयर जारी गरेकोमा सर्वसाधारणको लागि बाँकी २५ लाख १० हजार चार सय ९३ कित्ता जारी गरिरहेको हो।
कम्पनीले अंकित मूल्य एक सय रूपैयाँको दरमा सेयर जारी गरिरहेको हो। कम्पनीको सेयरमा १० देखि १० हजार कित्तासम्म आवेदन दिन सकिने छ।
कम्पनीको सेयर जारी छिटोमा असोज २९ गतेसम्म खुला रहनेछ। यो अवधिमा जारी गरेको पुरै सेयर बिक्री नभएमा कात्तिक ९ गतेसम्म खुला रहनेछ।
कम्पनीको सेयर बिक्री प्रबन्धकमा नबिल इन्भेष्टमेन्ट बैंकिङ छ। कम्पनीले इक्रा नेपालबाट बी रेटिङ पाएको छ। यसअघि माइनस बी रेटिङ पाएको कम्पनीको रेटिङस्तरमा सुधार भएको इक्राले उल्लेख गरेको हो।
तर पनि, समयमै दायित्व भुक्तानी गर्न सक्ने कम्पनीको क्षमता कमजोर रहेको यो रेटिङले देखाउँछ। कम्पनीले पशुपन्क्षीको लागि र माछाको लागि दाना उत्पादन गर्दै आइरहेको छ।
कम्पनीको सुनौलो र हिमदाना नामका दुई उत्पादन छन्। कम्पनीको रूपन्देहीमा रहेको उद्योगको वार्षिक दाना उत्पादन क्षमता एक लाख ३५ हजार मेट्रिक टन छ।
कम्पनीको आर्थिक वर्ष २०८०/८१ वार्षिक आम्दानी एक अर्ब नौ करोड रूपैयाँ छ। कम्पनी पछिल्लो समय कुखुरापालन व्यवसाय र मासु उत्पादनमा पनि लागेको छ।
कम्पनीमा सतिशचन्द्र श्रेष्ठको ३४ प्रतिशत, चन्द्र पंकज डेभलपर्सको १२ प्रतिशत, शिखर इन्सुरेन्सको ८ प्रतिशत, सिटिजन्स लाइफ इन्सुरेन्सको चार प्रतिशत सेयर स्वामित्व छ।
-1746009348.jpg)
