बिहीबार पनि नेप्से परिसूचक उच्च अंकले बढेको छ।
बुधबार ३३.२९ र बिहीबार ३१.५४ अंक गरी यो दुई दिनमा नेप्से ६४.८३ अंकले बढेको छ।
नेप्से २६९५.६० विन्दुमा बन्द भएको छ।
कारोबार रकम पनि अघिल्लो दिनको तुलनामा बढेको छ।
बुधबार ७ अर्ब ४५ करोड रूपैयाँको कारोबार भएकोमा यसदिन ८ अर्ब ५७ करोड रूपैयाँको कारोबार भएको छ।
यसदिन ३५० वटा धितोपत्रको दुई करोड ३२ लाख ५८ हजार ९ कित्ता सेयर किनबेच भएको हो।
बिहीबार १८१ कम्पनीको सेयर मूल्य बढेको छ भने ९१ वटाको घटेको छ। यस्तै, ६ कम्पनी स्थिर छन्।
बेनी हाइड्रोपावरको मूल्य सर्वाधिक १५ प्रतिशतले बढेको छ।
उक्त कम्पनीको प्रतिकित्ता मूल्य ६१७ रूपैयाँ २० पैसा पुगेको छ।
यस्तै, सोपान फर्मास्युटिकल्सको मूल्य ८.७२ प्रतिशतले बढेर प्रति कित्ता मूल्य ६७३ रूपैयाँ कायम भएको छ।
यसदिन एनआरएन इन्फ्रास्टक्चरको मूल्य सर्वाधिक ३.६५ प्रतिशतले घटेको छ।
उक्त कम्पनीको प्रतिकित्ता मूल्य एक हजार ३९७ रूपैयाँ पुगेको छ।
यसैगरी, चिरख्वा हाइड्रोपावरको मूल्य ३.१४ प्रतिशतले घटेर प्रति कित्ता मूल्य ४९३ रूपैयाँमा सीमित भएको छ।
बिहीबार घलेम्दी हाइड्रोको सर्वाधिक कारोबार भएको छ।
उक्त कम्पनीको ३३५ रूपैयाँमा ३५ करोड ६१ लाख रूपैयाँको कारोबार भएको छ।
यो मूल्य अघिल्लो दिनको तुलनामा २.७६ प्रतिशत बढेको हो।
सर्वाधिक सेयर खरिद–बिक्री हुने दोस्रो सूचीमा सिद्धार्थ बैंक रहेको छ। उक्त कम्पनीको ४५४ रूपैयाँ ८० पैसामा २५ करोड ३८ लाख रूपैयाँ बराबरको सेयर कारोबार भएको छ।
आज कारोबारमा आएका १३ वटा समूहगत परिसूचकमध्ये सबै समूहको परिसूचक बढ्दा समग्र नेप्से बढेको हो।
यसमध्ये अन्य समूहको परिसूचक सर्वाधिक २.४५ प्रतिशतले बढेको छ।
